Ku na mblodhe, moj kasolle!

Radhë për libra që nga gushti

Si dikur për radhë qumshti

Merr një grua, merr një burrë

Por nuk soset radha kurrë.

Te këmbët na bie gjaku

Qesh librarja nga banaku:

“Kët’ e kemi, kjo s’na ngeli...”

Librat blejmë si gjysma gjeli.

Çmimi i librit ngjit në shpinë

Fort ta prish, ah terezinë

Flet një plakë: A më dëgjoni

Për libra nuk del pensioni…

“...E kam vajzën pa parti,

Ndaj ka ngel pa punë në shpi

S’ju gënjej për këtë besë

Kam dy nipa dhe një mbesë.

...Çmimet po na vijnë hakut

Duhet dhe pension` i plakut.

Oh, moj zonjë, ç’na kënaqe

U bënë librat si ilaçe!...

Laps’ i zonjës nis shënon

Në tre libra një numron

Kundërshton çdo pretendim:

“Kështu ka ardh` me udhëzim…”.

..Gjoja shteti rimburson

Ne i blejmë me pension…”

Nëse ke pagu tridhjetë

Zonja të shënon veç dhjetë.

Kështu ecën historia

Bën biznes dhe libraria

Ku na mblodhe, moj kasolle,

Biznes dhe me libra shkolle.