Kukeli e Meha, hyrjet e reja në kombëtare
Trajneri De Biazi shpall listën për ndeshjet me Qipron e Zvicrën, bëhet realitet ardhja e dy kosovarëve
Burim Kukeli dhe Alban Meha do të jenë fytyrat e reja të Shqipërisë në startin e fushatës kualifikuese për Botërorin Brazil 2014. Trajneri Xhani de Biazi më në fund e ka bërë zyrtare veshjen e tyre me ngjyrat kuqezi, teksa ka vendosur ti thërrasë në skuadër për ndeshjet kundër Qipros e Zvicrës, përkatësisht më 7 dhe 11 shtator. Italiani ka nxjerrë dje listën me emrat e lojtarëve, me të cilët do të synojë tu bëjë një nisje të mbarë eliminatoreve. Ndër 24 të besuarit e De Biazit, janë 18 lojtarë që vijnë nga skuadra të huaja dhe gjashtë nga kampionati shqiptar, ku pjesën e luanit e ka Skënderbeu. Kuqezinjtë do të grumbullohen nesër në orën 12:30 në kompleksin Tropikal në Durrës, në fushën e të cilit do të zhvillojnë edhe stërvitjen e parë, pasdite vonë.
Debutuesit – Alban Meha, i lindur më 26 prill 1986 në Mitrovicë, luan në ligën e dytë gjermane, me Paderbornin. Mesfushori kosovar cilësohet si shumë i rëndësishëm për skuadrën gjermane, me të cilën luan që nga viti 2011. Në sezonin aktual, ka luajtur në tri ndeshje të kampionatit, duke shënuar dy gola. Po ashtu, ka shënuar edhe një tjetër gol në Kupën e Gjermanisë, në ndeshjen e humbur me Arminia Bilefeld. 28-vjeçari Kukeli, lindur më 16 janar 1984 në Gjakovë, luan gjithashtu në mesfushë. Në merkaton e kësaj vere ai u transferua te Zyrihu nga Lucerna, ku ka luajtur me Jahmir Hykën. Mesfushori ka luajtur pesë ndeshje në kampionat, por ende nuk ka shënuar për Zyrihun. Në rast se të dy luajnë në dy takimet e ardhshme, numri i debutuesve në drejtimin e italianit shkon në nëntë, pasi deri tani ai ka veshur shtatë lojtarë me fanellën kuqezi.
Mungesat – Dëmtimi e ka lënë jashtë skuadrës Elis Bakajn, por ndërkohë trajneri italian ka bërë edhe ndryshime të tjera në listë, krahasuar me ndeshjen e fundit, miqësoren kundër Moldavisë. Nuk janë thirrur më Dushku, Memushaj, Zeqiri e Vucaj, ndërsa portieri Orges Shehi është emri tjetër i ri për këtë ndeshje, bashkë me Kukelin e Mehën. Ashtu si në ndeshjen me Moldavinë, i gatshëm do të jetë Hamdi Salihi, ndërsa vazhdon të mbetet jashtë Gjergji Muzaka, tashmë lojtar i Flamurtarit. Italiani ka thirrur pesë sulmues për dy ndeshjet e botërorit, megjithatë midis tyre nuk figuron Bekim Balaj, i transferuar gjatë verës te Sparta e Pragës.
Dritan Ikonomi
Skeda personale
Burim Kukeli
Ditëlindja: 16 janar 1984
Vendlindja: Gjakovë
Skuadra: Zyrih
Roli: Mesfushor
Shtatlartësia: 180 cm
Pesha: 72 kg
Këmba e preferuar: E majta
Alban Meha
Ditëlindja: 26 prill 1986
Vendlindja: Mitrovicë
Skuadra: Paderborn
Roli: Mesfushor
Shtatlartësia: 173 cm
Pesha: 74 kg
Këmba e preferuar: Të dyja
Nënshtetësia
Kukeli e Meha kanë aplikuar të dy për nënshtetësinë shqiptare, çka do tu mundësonte të vishnin fanellën kuqezi. Megjithatë, në sitin zyrtar të Presidentit të Republikës, ku publikohen të gjitha dekretet e firmosur nga kryetari i shtetit, nuk figuron ende asnjë vendim për dhënien e nënshtetësisë për dy lojtarët nga Kosova. Gjithsesi, bëhet fjalë vetëm për një formalitet nga ana e presidentit Nishani, pasi lojtarëve kosovarë nuk u janë nxjerrë asnjëherë pengesa në raste të ngjashme në të kaluarën.
17
De Biazi ka thirrur 17 lojtarë që luajnë në ligat e para e të dyta të dhjetë vendeve të tjera.
6
Lojtarë janë thirrur nga kampionati shqiptar. Skënderbeu është skuadra më e përfaqësuar, me tre, ndërsa Flamurtari, Tirana e Vllaznia kanë nga një lojtar.
Kolona e pestë
Tre lojtarë dinë
gjithçka për Zvicrën
Asnjë lojtar kuqezi nuk luan në Qipro, kundërshtari i parë i Shqipërisë në Grupin E të kualifikueseve evropiane për Brazil 2014. Ndryshe paraqitet situata për ndeshjen e dytë, me Zvicrën. Tre nga lojtarët De Biazit aktivizohen pikërisht në futbollin helvet. Jahmir Hyka luan me Lucernën, skuadra e qytetit ku do të zhvillohet ndeshja, ku më parë ka pasur shok skuadre edhe Kukelin, tani te Zyrihu. Armando Sadiku është i treti, por ky i fundit luan në ligën inferiore, me Luganon.
Lojtarët e thirrur nga Xhani de Biazi
Samir Ujkani 05.07.1988 Palermo
Etrit Berisha 10.03.1989 Kalmar
Orges Shehi 20.09.1977 Skënderbeu
Lorik Cana 27.07.1983 Lazio
Armend Dallku 16.06.1983 Vorskla
Tefik Osmani 25.02.1985 Vllaznia
Andi Lila 12.02.1986 Janina
Mergim Mavraj 09.06.1986 Greuther Furth
Renato Arapi 28.08.1986 Skënderbeu
Sabien Lilaj 10.02.1989 Skënderbeu
Franc Veliu 11.11.1988 Flamurtari
Jahmir Hyka 08.03.1988 Luzern
Emiljano Vila 12.03.1988 Janina
Burim Kukeli 16.01.1984 Zurich
Ansi Agolli 11.10.1982 Qaraback
Alban Meha 26.04.1986 Paderborn
Gilman Lika 13.01.1987 Tirana
Ervin Bulku 03.03.1981 Sepahan
Armando Sadiku 27.05.1991 Lugano
Odise Roshi 22.05.1991 FSV Frankfurt
Hamdi Salihi 19.01.1984 DC United
Edgar Çani 22.07.1989 Polonia
Erjon Bodgani 14.04.1977 Siena
Ahmed Januzi 08.07.1988 Vorskla
Ndeshjet e Shqipërisë në Grupin E
07.09.2012 Shqipëri-Qipro
11.09.2012 Zvicër-Shqipëri
12.10.2012 Shqipëri-Islandë
16.10.2012 Shqipëri-Slloveni
22.03.2013 Norvegji-Shqipëri
07.06.2013 Shqipëri-Norvegji
06.09.2013 Slloveni-Shqipëri
10.09.2013 Islandë-Shqipëri
11.10.2013 Shqipëri-Zvicër
15.10.2013 Qipro-Shqipëri
Zyrtarja e parë e De Biazit
Italiani e ka drejtuar Shqipërinë në katër miqësore, tani luhet seriozisht
Pikët janë ato që do të kenë vlerë në ndeshjet e ardhshme të Shqipërisë nën drejtimin e Xhani de Biazit. Italiani e ka drejtuar skuadrën kuqezi në katër takime deri tani, që të gjitha miqësore. Në premierën e tij, trajneri që pasoi kroatin Kuzhe u mund 2-1 nga Gjeorgjia, por më pasi arriti dy fitore radhazi, kundër Katarit në Spanjë dhe Iranit në Stamboll, përkatësisht 2-1 dhe 1-0. Takimi i fundit ishte i pari që Shqipëria luante në Qemal Stafa nën drejtimin e trajnerit italian, por paraqitja ishte edhe më zhgënjyese se barazimi steril me Moldavinë. Pas takimit, trajneri i shpreh se e njeh mirë gjendjen dhe premtoi një fytyrë tjetër përballë Qipros. Megjithatë, më shumë skuadrës i interesojnë pikët, pavarësisht paraqitjes.
Shqipëria nën drejtimin e De Biazit
29.02.12 Gjeorgji-Shqipëri 2-1
22.05.12 Shqipëri-Katar 2-1
27.05.12 Shqipëri-Iran 1-0
15.08.12 Shqipëri-Moldavi 0-0