Kundër ndryshimit të kufijve
Këto qëndrime ministrat i shprehën të premten pas një takimi, ku përveç tjerave kanë diskutuar për mundësinë e forcimit të marrëdhënieve diplomatike mes Prishtinës e Shkupit.
I pyetur për gjendjen në pjesën veriore, ministri i Jashtëm, Enver Hoxhaj ka thënë se problemet atje po i sjellin disa persona që janë mbetje e regjimit të Millosheviqit. Sipas tij, situata në veri është krijuar edhe si pasojë e ndërhyrjeve të vazhdueshme nga Qeveria e Serbisë, të cilat veprime askush në botën demokratike nuk i përkrahë.
“Më lejoni t’u them që për të gjitha vendet e BE-së është mëse e qartë se politika e Serbisë e qëllimeve të pakufi të ndërhyrjes në shtetet e tjera është një politikë e cila i takon të kaluarës dhe unë jam shumë i sigurt që në ditët në vijim do të ketë presion të shteteve anëtare të BE-së që para marrjes së statusit të kandidatit të filloj procesi i shpërbërjes së strukturave ilegale në veri. E tërë përpjekja ime dhe përpjekja e Qeverisë është që vënia e statusit të kandidatit të ndërlidhet me shpërbërjen e këtyre strukturave ilegale”, ka thënë ai.
Në këtë rast, Hoxhaj ka ritheksuar gatishmërinë e institucioneve të Kosovës për të implementuar planin e Ahtisarit për veriun, i cili plan sipas tij favorizon maksimalisht komunitetin serb.
Edhe ministri i Punëve të Jashtme i Maqedonisë, Nikolla Poposki ka dhënë qëndrime të njëjta sa i përket situatës në veri të Kosovës, ndërsa ka kundërshtuar pretendimet e Beogradit zyrtar për ndarje të Kosovës.
“Zgjidhjet në rajonin tonë nuk duhet të kërkohen me ndryshimin e kufijve, por në perspektivat e integrimit . Unioni Evropian na jep një kornizë të shkëlqyer në këtë drejtim dhe mendoj se kjo duhet të jetë udhërrëfyesi ynë në sjelljen e vendimeve në periudhën e ardhme. Duhet të fokusohemi në dobi dhe përfitimet që na ofrojmë dhe mos të kthehemi në zgjidhjet të cilat i takojnë një epokë tjetër, e jo atij të integrimit modern të Unionit Evropian”, ka thënë Poposki.
Ndryshe vizitën e planifikuar që para disa muajve dhe të shtyrë për disa javë, ministri i Punëve të Jashtme të Maqedonisë, Nikolla Poposki po e realizon tani në Prishtinë. Poposki përveç me ministrin Enver Hoxhaj është takuar edhe me kryeparlamentarin Jakup Kransiqi, kurse do të ketë takime edhe me drejtues tjerë të shtetit.