Kuqi e çon Oldhamin në finale të Kupës

Shefki Kuqi vazhdon të shkëlqejë në fanellën e Oldham Athletic. Sulmuesi kosovar e ndihmoi ekipin e tij të kualifikohet në finale të trofeut Johnstone's Paint Trophy, në zonën veriore, pas fitores 2:0 ndaj Bradfordit.

35 vjeçari e realizoi golin e dytë në minutën e 80-të, ndërsa të parin e shënoi Adeyemi (61’). Njëherësh, ky ishte goli i 13-të për ish përfaqësuesin finlandez në fanellën e Oldhamit, i cili garon në ligën e katërt angleze.

Në finale të zonës veriore të këtij trofeu, ekipi i vushtrriasit do të përballet me ekipin Chesterfield. Ndeshja e parë do të zhvillohet më 17 janar të vitit që vjen, kurse ajo e dytë, më 7 ose 8 shkurt.

Nëse arrin ta fitojë Johnstone's Paint Trophy për zonën veriore, Oldhami më pas do të luajë me fituesin e zonës jugore në finalen e madhe të Wembleyt. Me Kuqin në skuadër, gjithçka është e mundshme.

Para se të transferohej në Oldham, ish futbollisti i Newcastles thoshte se do ta konsideronte zhgënjim nëse nuk do t’i shënonte 15 gola deri në fund të dhjetorit. Dhe, ai, në fillim të dhjetorit është shumë afër kësaj shifre.