Sezoni debutues, i suksesshëm
Lum Rexhepi pati paraqitje pozitive në sezonin e tij debutues me FC Honka. Mbrojtësi kosovar me pasaportë finlandeze zhvilloi 14 ndeshje dhe ndihet i kënaqur me atë që shfaqi në fushë gjatë sezonit të fundit në elitën e futbollit finlandez.
“Faza para-sezonale shkoi mjaft mirë dhe aty pata sukses të madh. Më pas sezoni nuk filloi në mënyrën më të mirë. Nuk i di arsyet, por unë i shikoja ndeshjet nga bankina. Por, më pas e pata më në fund periudhën finale kur luaja dhe vazhdimësia më përmirësoi. Ishte një sezon OK për mua”, deklaroi ish futbollisti i Helsinkit për ueb faqen veikkausliiga.com.
19 vjeçari pret të ketë paraqitje edhe më të mira sezonin e ardhshëm, të dytin në fanellën e Honkas. “Tash unë nuk duhet të mendoj shumë për sezonin debutues dhe nuk mund ta përdor atë si mburojë. Duhet të shikoj përpara. Pres shumë nga vetja sezonin e ardhshëm. Shpresoj që ky sezon të jetë edhe më i mirë, në nivelin personal dhe në atë kolektiv”, vazhdoi Rexhepi
Ai e pranon se ka ende hapësirë për t’u përmirësuar dhe se nuk kënaqet kurrë me aq sa ka arritur. Ai është ende i ri dhe me punë të madhe beson se do të arrijë larg. Në Finlandë, Lum Rexhepin e krahasojnë me legjendën e këtij vendi, qendërmbrojtësin Sami Hyppia.
Rexhepi ishte transferuar në Honka vitin që shkoi nga Helsinki, ku ishte pjesë e ekipit të të rinjve. Ai ishte provuar muajin e kaluar te klubi holandez PSV Eindhoven. Rexhepi pati një test të suksesshëm atje dhe nuk e ka përjashtuar mundësinë që në të ardhmen të zbarkojë në Holandë.