“Lajmet kundër heqjes së vizave, nga dëshpërimi i Edvin Ramës”

Përgënjeshtron Ministria e Brendshme

Ministria e Brendshme ka hedhur dje poshtë dezinformimin e paraqitur në disa media të shtypit të përditshëm, të njohura për politika redaksionale pro Kryetarit të Partisë Socialiste Edi Rama, sipas të cilit Shqipëria rrezikon liberalizimin e vizave për shkak të mosplotësimit të kritereve dhe është më pas se Bosnja në këtë drejtim.

“Tashmë që e ka të qartë se nuk mundet më të pengojë procesin e liberalizimit të vizave, Z. Rama përdor mediat e kontrolluara prej tij për të sulmuar progresin e shpejtë e të plotë të Shqipërisë në plotësimin e kritereve, vlerësuar nga të gjithë ekspertët dhe aktorët vendimmarrës europianë si progres që ka prodhuar standarde jo vetëm nga më të lartat në rajon, por të krahasueshme me standardet e vendeve të hapësirës ‘Schengen”, shprehej Ministria e Brendshme nëpërmjet një njoftimi të saj për shtyp.

“Me këtë rast, Ministria e Brendshme garanton edhe njëherë qytetarët shqiptarë, se në sajë të përkushtimit të plotë për përmbushjen e kritereve për liberalizimin e vizave, Shqipëria demonstron sot para partnerëve europianë, jo vetëm plotësimin e detyrave të kërkuara, por edhe zbatimin efikas të praktikave më të mira europiane në fushën e rendit e sigurisë, kontrollit kufitar dhe dokumenteve të sigurta të identitetit”, përfundonte njoftimi për shtyp i Ministrisë së Brendshme.