Laze: Lojtarët dhe federata, fajtorët për rënien e Elbasanit

 

Ai di fajtorët për dështimin e skuadrës së tij gjatë këtij sezoni. Ndonëse nga qelia e burgut, presidenti i Elbasanit Arben Laze akuzon drejtpërsëdrejti drejtuesit e FSHF-së por jo vetëm. Sipas tij një pjesë të fajit duhet ta mbajnë edhe futbollistët të cilët nuk kanë ndjerë si duhet peshën e fanellës verdheblu.
Z. Laze si ndiheni kur shikoni që Elbasani juaj është thuajse i rënë në Kategori të Parë?
Më vjen shumë keq për skuadrën aq sa nuk mund ta imagjinoja kurrë. Ndihem i turpëruar dhe kokulur kur mendoj rënien e Elbasanit.
Cilin bëni fajtor për rënien e Elbasanit?
Fajtorë janë të gjithë. Në radhë të parë fajtor bëj veten por mendoj se futbollistët kanë një përgjegjësi të madhe. Ata duhet të mbajnë turpin e fanellës që realisht dëshmuan se nuk e meritonin.
A është marrë mendimi juaj për merkaton që është bërë në janar dhe për ndërrimet e trajnerëve?
Po më kanë pyetur për shumicën e futbollistëve që janë marrë gjatë merkatos së verës. Por unë kam qenë i mendimit se edhe pesë futbollistë duheshin të largoheshin nga skuadra. Ndërsa përsa i përket trajnerëve kam qenë kategorikisht kundër ardhjes së tyre, pra kundër ndërrimeve të bëra.
Flitet se ju keni harxhuar rreth 1.2 miliardë lekë për Elbasanin...     
Është e vërtetë që kam harxhuar shumë lekë për klubin e Elbasanit por ju garantoj se nuk jam bërë ansjëherë pishman për këtë gjë. Ka qenë kënaqësia e ime.
A mendoni se Elbasani ka rënë viktimë e klaneve në Superligë dhe të politikës?
Unë mendoj se Elbasanin e nxori federata nga kategoria. Ata ndryshuan kalendarin i cili deri në ato momente ishte goxha favorit për ekipin tonë dhe po luhej seriozisht. Ndërsa përsa i përket ndërhyrjeve të tjera si të politikanëve unë as jamë marrë dhe as do të merrem me politikë ndonjëherë. Partia ime ka qenë dhe do mbetet KS Elbasani.