Le Pen në fushatë me fëmijë

Marine Le Pen, kandidatja e Frontit Kombëtar në zgjedhjet presidenciale franceze, ka zhvilluar fushatë me fëmijë, për të treguar një imazh më pozitiv.

Le Pen mbështetet kështu tek të rinjtë, për të thyer klishenë mbi partinë e saj të ekstremit të djathtë, bën të ditur agjencia e lajmeve “AFP”.

Në takimin elektoral në Bordo, ajo ishte e rrethuar nga fëmijët dhe përshëndeti militantët që ishin mbledhur për ta mbështetur.

Ndërkohë, për kandidatët e tjerë duket se gjërat nuk po ecin edhe aq mirë. Eva Joly, nga radhët e Partisë së Gjelbër, u kërcënua disa ditë më parë me një zarf me plumb.

68-vjecarja, e cila mbrohet nga dy truproja, në profesionin e mëparshëm ka qenë një gjykatëse. Kandidatura e saj ka ngjallur debate të shumta për shkak të prejardhjes norvegjeze.

Ndërsa kandidati socialist, Francois Hollande, e nisi si mos më keq fushatën e tij elektorale në Paris. Në një takim me mbështetësit e tij, një ndër të pranishmit i shpëtoi sigurimit dhe i hodhi atij miell në fytyrë.

Ndërsa presidenti Nicolas Sarkozy, i cili garon për një mandat të dytë, njoftoi në fund të janarit planet për vendosjen e një tatimi mbi transaksionet financiare.