Leku humb terren ndaj euros dhe dollarit
Leku ka vazhduar zhvlerësimin ndaj monedhave të huaja edhe gjatë kësaj jave, duke humbur terren pothuajse ndaj të gjitha monedhave. Megjithatë, ditët e fundit ai ka humbur pikë me ritëm më të ulët se javën e shkuar. Kështu, sipas kursit zyrtar të Bankës së Shqipërisë, një euro u këmbye me rreth 130 lekë, ose një vlerësim prej 0.46 lekësh në dy ditë. Dollari ka qenë monedha që ka pësuar vlerësimin më të fortë në dy ditë. Ai u kuotua dje me afro 103.2 lekë dhe ka fituar terren prej 1.85 lekësh brenda dy ditësh. Paundi britanik vazhdon të rikuperojë humbjet e pësuara fundvitin e shkuar ndaj lekut. Dje ai u tregtua për 146.16 lekë, ose 0.38 lekë më shumë se një ditë më parë. Zyrtarët e financave thonë se ky është një efekt i përkohshëm i dobësimit të lekut dhe se ai do ta marrë shpejt veten. Ndërkohë, marrja e kredisë tregtare prej 300 milionë eurosh pritet të ketë një ndikim në stabilizimin e kursit, jo në mënyrë direkte, por ekspertët thonë se do të japë efektin e saj në treg. Zhvlerësimi i lekut, sipas ekspertëve, ka një impakt në çmimet e mallrave të konsumit, pasi shumica e tyre importohen me kursin aktual dhe kushtojnë më shtrenjtë. Efekt tjetër është edhe shtrenjtimi i kostos së kredive për shumicën e atyre që kanë marrë kredi nëpër banka, pasi 70% e totalit është në valutë dhe kryesisht në euro. Ndërkohë, në tregjet ndërkombëtare dollari po fiton terrenin e humbur prej kohësh ndaj euros. Monedha evropiane këmbehej dje me rreth 1.26 dollarë, kur pak kohë më parë tregtimi iu afrua nivelit prej 1.4 dollarësh.
ENEL-i, marrëveshje me ndërtuesit shqiptarë për TEC-in
Kompania e prodhimit të energjisë, Enel, nënshkroi dje një marrëveshje me Konfindustrinë Shqiptare, marrëveshje në të cilën parashikohet nënkontraktimi i kompanive vendase gjatë ndërtimit të kompleksit energjetik në Porto Romano. ENEL-i ka nënshkruar një kontratë me qeverinë shqiptare për ndërtimin e një termocentrali me fuqi 800 MW me qymyr të pastër, një bankinë ngarkim-shkarkimi, një linjë ajrore transmetimi me tension 400 kV, e cila lidh termocentralin e ri me rrjetin shqiptar të shpërndarjes dhe një linjë nënujore 500 kV, që do të lidhë centralin me rrjetin italian të shpërndarjes. Kostoja totale e këtij projekti parashikohet të jetë 1 miliard euro. Marrëveshja e djeshme parashikon përfshirjen e kompanive shqiptare në ndërtimin e disa njësive të këtij kompleksi.