Leku humb terren ndjeshëm ndaj euros

 

Monedha vendase ka vazhduar të zhvlerësohet ndaj monedhave të huaja. Sipas të dhënave nga Agjencitë e Këmbimit Valutor në vend, një dollar blihet me 101,6 lekë dhe u shitet me 102,3 lekë, ndërsa një euro u blihet me 130 lekë dhe u shitet me 130,7 lekë. Në këtë mënyrë monedha evropiane, euro, ka vazhduar të forcohet ndaj lekut në këmbimet valutore dhe tashmë rezulton me fitimin e afro 5,5 pikëve kundrejt një muaji më parë. Sipas ekspertëve të ekonomisë, zhvlerësimi i lekut ka ardhur si pasojë e kërkesës së lartë në treg për monedhën evropiane. Por si pasojë e krizës globale financiare, emigrantët kanë nisur të dërgojnë më pak para tek të afërmit e tyre. Pikërisht rënia e remintancave është një ndër faktorët që ka ndikuar në zhvlerësimin e lekut. Një tjetër faktor ka të bëjë me vendimin e marrë nga Banka e Shqipërisë për të ulur normën bazë të interesit për lekun, nga 6.25 për qind që ishte në fillim të vitit, tashmë është 5.75 për qind.