Letrat nga Shqipëria, tani me pullën e NATO-s,

NATO-ja, e emetuar në pullat dhe zarfet shqiptare

Për një javë, korrespondenca postare me pullat e NATO-s

Një letër nga Shqipëria e nisur drejt shteteve të tjera të botës apo dhe brenda vendit do të mbartë me vete dhe 28 flamuj të vendeve anëtare të NATO-s. Posta Shqiptare ka vendosur që për rreth një javë të gjitha letrat që do të postohen nga gjithë filialet e saj

Do të kenë të gjitha pulla me NATO-n. Duke iu bashkëngjitur atmosferës festive të anëtarësimit të Shqipërisë në NATO, Posta Shqiptare në vazhdimësi të emetimit të pullës së parë për këtë eveniment më 3 prill 2008, ka udhëzuar të 551 zyrat postarë që në datat 3-8 prill të këtij viti i gjithë shërbimi postar të kryhet me pullat e NATO-s. Në këtë mënyrë të gjithë bashkatdhetarët kudo që ndodhen nëpër botë, në korrespondencën e tyre do të përdorin pullat e emetuara nga Posta Shqiptare në mënyrë që opinioni publik të familjarizohet me faktin se tashmë vendi ynë është pjesëtar i Aleancës Atlantike të Veriut dhe prania e pullave do të bëjë çdo shqiptar të jetë pjesë e krenarisë sonë kombëtare për këtë ngjarje të madhe historike e cila e bën Shqipërinë pjesë integrale të Perëndimit, duke e kthyer në origjinën e saj historike nga e cila e ndau sistemi komunist. Siç tha dhe Kryeministri Berisha, ky eveniment mund të konsiderohet si pavarësia e dytë e Shqipërisë dhe në kuadrin e kësaj atmosfere, Posta Shqiptare ka vendosur në çdo zyrë postare e shumë ambiente të tjera në të gjithë Shqipërinë postera të cilat janë prodhuar në mënyrë të posaçme për këtë eveniment tejet të rëndësishëm për të gjithë shqiptarët.