Lidhte energjinë, vdes tragjikisht babai i 2 fëmijëve në Porto Romano
Durrës – Ka humbur jetën teksa përpiqej të lidhte energjinë për fëmijët e tij 38-vjeçari nga Porto Romano. Incidenti tragjik ka ndodhur paraditen e së enjtes dhe, sipas policisë, viktima është Luan Dani, vjeç 38, banor i lagjes Porto Romano në Durrës dhe baba i dy fëmijëve të mitur. Nga hetimet e para që u kryen në vendin e ngjarjes, rezultoi se Dani ka gjetur vdekjen aksidentalisht në momentin që po mundohej të lidhte një tel për të marrë energji elektrike për banesën e tij, në një shtyllë të tensionit të lartë. Një goditje tensioni ka përfshirë trupin e 38-vjeçarit duke i shkaktuar vdekje të menjëhershme. Skena u përjetua keq nga familja e tij dhe banorët përreth. Ardhja e policisë ndonëse me shpejtësi, thjeshtë shërbeu për konfirmimin e vdekjes së të ndjerit, që la dy fëmijë jetimë.
Humbi kontrollin e automjetit, përfundoi në kanal 36-vjeçari
Shkodër – Një aksident ka ndodhur dje në aksin rrugor Shkodër-Velipojë. Sipas policisë, 36-vjeçari Jetmir G., teksa drejtonte autoveturen tip “Volksvagen Golf”, me targë SH 3062 C, rreth 200 metra pa shkuar tek vendi i quajtur “Ura e Gjolulit”, ka humbur drejtimin e mjetit duke dalë nga rruga dhe duke përfunduar në një kanal kullues në anë të saj. Si pasojë, është dëmtuar 18-vjeçari E. J., lindur e banues në qytetin e Shkodrës, i cili udhëtonte si pasagjer në mjetin e sipërpërmendur. I dëmtuari është dërguar në Urgjencën e Spitalit të Shkodrës pa probleme serioze dhe jashtë rrezikut për jetën. Policia po heton për veprën penale të “Shkeljes së rregullave të qarkullimit rrugor”.
11 Korrik 2009