Ligji antiduhan, Ministria pranon dështimin dhe nis nga sanksionet

Ligji për duhanin nuk do të ndryshojë, por do të forcohet me sanksione ligjore. Ky fakt është konfirmuar nga zëvendësministri i Shëndetësisë, Arben Ivanaj, sipas të cilit, ligji për duhanin është ndër më të mirët. Moszbatimi i këtij ligji në praktikë është pranuar edhe nga Ministria e Shëndetësisë. Kjo Ministri cilëson se ligji për duhanin, i miratuar një vit më parë, është ndër më të mirët, por zbatimi i tij lë për të dëshiruar. Në analizën e punës shtatëmujore të këtij dikasteri, drejtuesit e Shëndetësisë deklaruan se kanë riparë strategjinë në luftën kundër duhanit dhe për zbatimin e saj janë vënë në lëvizje strukturat përgjegjëse. Për këtë, zëvendësministri i Shëndetësisë, Arben Ivanaj, sqaron se ligji mund të forcohet në sanksione dhe kjo është shumë e rëndësishme të kuptohet nga të gjithë. Sipas numrit dy të Shëndetësisë, çdo iluzion se ligji për duhanin do të ndryshojë është mentalitet i gabuar. Zbatimi i ligjit për duhanin është detyrë funksionale e institucioneve që varen nga Ministria e Shëndetësisë dhe e policive bashkiake apo komunale. Më tej Ivanaj shprehet: “Ligjin për duhanin ne nuk e kemi menduar si ligj represiv, si dënim penal, por e kemi menduar si ligj të parandalimit dhe ai duhet të jetë i tillë”. Për zëvendësministrin e Shëndetësisë zbatimin e këtij ligjit në praktikë e kanë penguar disa “sëmundje” të shoqërisë sonë, apo mentalitete të vogla. Për këtë, sipas tij, po punohet për të ngritur strukturat e promocionit, të cilat lidhen jo vetëm me zbatimin e ligjit për duhanin, por dhe me të tjerë. Ivanaj rithekson se “ligji për duhanin nuk i referohet asnjë baze në Kodin Penal, pra është problem që duhet të zgjidhet me anë të edukimit të njerëzve dhe rritjes së vlerave tona civile”.

5 Shtator 2008