Lirimi me kusht, tërhiqet Sokol Koçiu

Sokol Koçiu është tërhequr nga kërkesa për lirim me kusht. Nuk ka dhënë ndonjë arsye se përse është tërhequr, ndërkohë që as nuk i është kërkuar nga gjyqtari arsyeja pse nuk e ka çuar deri në fund këmbënguljen e tij për lirim nga burgu. Pas katër seancash të shtyra për mungesë së kërkuesit, i gjendur përballë kërkesës së drejtpërdrejtë të Koçiut, e bërë nga vetë ai në sallën e gjyqit, gjyqtari, Artan Broci, që ishte duke marrë në shqyrtim këtë kërkesë, vendosi ta pranojë atë dhe të pezullojë gjyqin. Vendimi është marrë dje në Gjykatën e Tiranës, ndërkohë që ka qenë vetë kërkuesi Koçiu që ka vendosur që procesi të ndërpritet. Kërkuesi nuk ka dhënë asnjë sqarim rreth tërheqjes së tij, ndërkohë që as gjyqtari i çështjes nuk ka kërkuar shpjegime për këtë tërheqje të të dënuarit të grupit “Kokaina”. Ndërkohë që i dënuari u tërhoq nga kërkesa e depozituar disa muaj më parë për lirim me kusht, një tjetër kërkesë është duke u shqyrtuar në Gjykatën e Tiranës, nga një tjetër gjyqtar. Bëhet fjalë për kërkesën e Koçiut për përfitim nga amnistia, kërkesë kjo që i është rrëzuar disa herë apo është shpallur moskompetenca për shqyrtimin e saj. Ish-oficeri i policisë gjyqësore në Prokurorinë e Përgjithshme është një nga të dënuarit e dosjes “Kokaina” dhe ka të paktën 2 vjet që në mënyrë të përsëritur depoziton kërkesa të ndryshme, si për ulje dënimi, amnisti dhe së fundi lirim me kusht, nga e cila hoqi dorë seancën e djeshme. Kërkesat kanë pasur si objekt amnistinë, ulje dënimi, liri me kusht, ndërkohë që shumica prej tyre janë rrëzuar nga ana e gjykatës. Ai u dënua me 12 vjet heqje lirie për akuzën e “trafikut të lëndëve narkotike” dhe “pjesëmarrje në organizatë kriminale”. Deri më sot, ai ka kryer pjesën më të madhe të dënimit dhe i kanë mbetur për të vuajtur edhe dy vite e gjysmë burg.

Detaj

2 vjet ka Sokol Koçiu që në mënyrë të përsëritur depoziton kërkesa të ndryshme, si për ulje dënimi, amnisti dhe së fundi lirim me kusht, nga e cila hoqi dorë seancën e djeshme