Lulzim Basha merr mandatin e kryebashkiakut brenda 10 ditëve

Sqarojnë dhe analizojnë specialistët dhe juristët

Flasin analisti Artan Hoxha dhe juristi Ylli Manjani: Nuk ndryshohet më vullneti i shprehur nga qytetarët e Tiranës. Mund të ketë diskutime teknike por nuk mund të ketë më ankimime në Kolegjin Zgjedhor

Juristët shprehen se Lulzim Basha ka fituar zyrtarisht bashkinë e Tiranës dhe se asnjë veprim tjetër ligjor i Partisë Socialiste s’mund ta tjetërsojë rezultatin e kryeqytetit.
Analisti Artan Hoxha thotë se vendimi i së premtes i Kolegjit Zgjedhor i ka siguruar kandidatit të mazhorancës, Lulzim Basha, fitoren në zgjedhjet në Tiranë.
Kjo pas rrëzimit të kërkesës së selisë rozë për të shpallur pavlefshmërinë absolute të vendimi 709, datë 23 maj, i marrë nga Komisioni Qendror i Zgjedhjeve, vendim që shpallte Lulzim Bashën fituese me 81 vota më shumë sesa Edi Rama, i cili garonte për herë të katërt për këtë post.
“Basha po shkon, mesa duket i sigurt, drejt postit të kryetarit të bashkisë së Tiranës. Vendimi i Kolegjit Zgjedhor ishte një hap që përcakton hapin përfundimtar. E pashë vendimin e Kolegjit Zgjedhor, si një fitore të drejtësisë, pasi vlerësojë se vendimi i Kolegjit Zgjedhor është një vendim i paqortueshëm. Ajo çka u krye ishte një hap i rëndësishëm procedural, i cili çon në një tjetër vendim të pritshëm të Kolegjit, i cili do të bazohet, vetëm dhe ekskluzivisht, te vlefshmëria apo pavlefshmëria e votave të hedhura në kutinë tjetër, për vlefshmërinë e të cilave unë mendoj se nuk ka asnjë dyshim. Ato janë vota të vlefshme dhe për pasojë Lulzim Basha kualifikohet si kryetar i bashkisë së Tiranës me 78 vota, përballë kandidatit tjetër, Edi Rama”, tha analisti Artan Hoxha.  

Përfaqësuesi ligjor i LSI-së pranë KQZ-së, Ylli Manjani
Ylli Manjani përfaqësues ligjor i Lëvizjes Socialiste për Integrim pranë Komisionit Qendror të Zgjedhjeve thotë se ajo që do të zhvillohet në Kolegj do të jetë thjesht procedurë, pasi fitoja e z.Basha në Tiranë është e sigurt.
“Praktikisht Lulzim Basha sot është fitues i Bashkisë së Tiranës. Jo se e ka vendosur Kolegji, jo se e ka vendosur KQZ-ja, por sepse kështu e kanë vendosur qytetarët e Tiranës dhe pikërisht këtë ka thënë Kolegji. Kanë mbetur edhe disa vendime të tipit procedural, d.m.th kanë mbetur në thelb për të vendosur nëse Z.Basha ka fituar me +81 vota apo me +78 vota. Praktikisht dhe ligjërisht nuk mund të ketë asnjë ndryshim më, pra nuk ndryshohet më rezultati i shprehur nga vullneti i qytetarëve të Tiranës. Mund të ketë diskutime juridike, teknike por mund të them se nuk ka më bazë ankimore për në Kolegj Partia Socialiste”, u shpreh Manjani. Në një përllogaritje që i bën Manjani kohës për shqyrtimin e ankimimit, ai thotë se brenda 10 ditësh fituesi i bashkisë së Tiranës do të shpallet zyrtarisht.