Man. Siti tërhiqet nga gara për Eto‘o

Mançester Siti ka konfirmuar se tërhiqet nga gara për sulmuesin Samuel Eto‘o. Nëpërmjet një deklarate zyrtare, klubi anglez bëri të ditur se lojtari i Barcelonës nuk u intereson më. Arsyet u sqaruan nga administratori, Geri Kuk: "Nuk ka asnjë dyshim që Eto‘o është një lojtar i madh, por u krijua një situatë që e bën të pamundur vazhdimin e bisedimeve. Kemi objektiva të qartë në merkato dhe do vazhdojmë në rrugën tonë". Siti i kishte ofruar Barçës 25 milionë euro për kartonin, ndërsa kamerunasi pritej të bëhej lojtari më i paguar në botë.