Manchester përgatit "varrin" e Romës

“Old Traford” do të presë sërish Romën, e cila në këtë stadium vetëm një vit më parë ka pësuar humbjen më të rëndë (7-1). Verdhekuqtë kanë udhëtuar drejt Anglisë me dëshirën e madhe për të provuar fatin, fat të cilin skuadra e Spaletit duhet ta kërkojë pa kapitenin e saj, Françesko Totin. Numri dhjetë i Romës ka qëndruar në kryeqytet për t’u rikuperuar plotësisht nga një dëmtim muskulor. Vendin e tij në sulm do ta zërë ashtu si edhe në ndeshjen e parë, Mirko Vuçiniç, i cili është shprehur me nota pozitive për këtë sfidë. “Roma ka 50 për qind mundësi për të fituar, - është shprehur sulmuesi. - E rëndësishme është të luajmë të përqendruar dhe të qetë. Edhe pse e dimë që kemi një rezultat të vështirë për të përmbysur, ne do të provojmë”.

Roma në “Old Traford” do të ketë mbështetjen e më shumë se 3500 tifozëve. Për verdhekuqtë kjo është transferta e tretë ndaj Mançesterit, pasi dy të parat i ka humbur 7-1 (sezonin e kaluar) dhe 1-0 (këtë sezon në fazën e grupeve). Skuadra e Sër Aleks Ferguson falë fitores 2-0 në Itali, me golat e Kristiano Ronaldos dhe Uejn Runit, do ta ketë më të lehtë për të administruar rezultatin dhe ka një shans shumë të mirë për të kaluar në gjysmëfinale.

Problemi i vetëm për trajnerin e Mançesterit, Ferguson, është reparti i mbrojtjes. Nemanja Vidiç nuk është i disponueshëm, pasi vuan nga një dëmtim në gju. Rio Ferdinand është dëmtuar në këmbë gjatë ndeshjes në kampionat kundër Milldesborou (2-2) dhe prezenca e tij në fushën e lojës do të vendoset vetëm në minutat e fundit. Ndërsa Geri Nevill dhe Mikael Silvestre vijnë nga dëmtime të gjata. Në sulm, trajneri skocez pritet të konfirmojë dyshen e suksesshme Kristiano Ronaldo (në një formë të shkëlqyer) dhe Uejn Runi. Për sa i përket Romës, i vetmi dyshim për trajnerin Spaleti është Akuilani. Nëse mesfushori italian nuk do t’ia dalë mbanë, atëherë zëvendësuesi i tij do të jetë David Pizarro. Junajtid nuk është eliminuar asnjëherë, duke u nisur nga një avantazh me dy gola. Megjithatë, bilanci me skuadrat italiane duket më i ekuilibruar. 13 fitore për “djajtë e kuq”, 4 barazime dhe 13 fitore të skuadrave italiane. Moti në Mançester ka qenë i ftohtë dhe termometri ka shënuar 3 gradë celsius. Ndërsa janë parë edhe reshje bore. Takimi do të gjykohet nga norvegjezi Ovrebo.

LIGA E KAMPIONËVE

 
Dje

Liverpul-Arsenal           20.45   (1-1)

Çelsi-Fenerbaçe           20.45   (1-2)

Sot

Barcelona-Shalke         20.45   (1-0)

Man.Utd-Roma            20.45   (2-0)

*Në kllapa rezultatet e ndeshjeve të para

 
KUPA UEFA

Nesër

Zenit-Leverkusen          18.30   (4-1)

Getafe-Bayern.M         20.45   (1-1)

PSV-Fiorentina            20.45   (1-1)

Sporting-Rangers          20.45   (0-0)

*Në kllapa rezultatet e ndeshjeve të para