Manjani: Kundër ligjit të ri për noterinë

Opozita pozicionohet kundër ndryshimeve në ligjin për noterinë në Republikën e Shqipërisë. Kryetari i Komisionit të Ligjeve pranë Partisë Socialiste, Ylli Manjani, bëri publike dje argumentet në mbështetje të këtij qëndrimi. Sipas tij, kjo ndërhyrje është në vazhdën e projektligjeve anti-reformë e anti-shtet që qeveria e sotme paraqet e vazhdon të paraqesë në Kuvend. "Më së fundi qeveria ka paraqitur për miratim një projektligj për disa shtesa e ndryshime në ligjin për Noterinë", tha Manjani. Ai konstatoi se me këtë nismë qeveria iu garanton shqiptarëve dhe veçanërisht investitorëve kaos juridik dhe pasiguri për çdo dokument noterial.