Maradona, akuzë për Neymarin e Pelen

Diego Armando Maradona, legjendë e futbollit argjentinas, por edhe atij botëror, e ka akuzuar talentin brazilian Neymar, të cilin e konsideron të paedukatë, njëjtë si legjendën braziliane Pele.

Ish kampioni i botës e ka mbrojtur bashkëkombësin e tij, Lionel Messi nga kritikat.

Maradona e akuzoi talentin e Santosit pas komenteve të këtij të fundit rreth yllit të Barcelonës. Neymar kishte thënë se mund të bëhet më i mirë se Messi duke luajtur në Santos, duke shtuar se nuk ka nevojë të largohet nga Brazili për të qenë më i miri, edhe pse kërkohet nga Real Madridi.

Dhe, Maradona nuk ka përtuar të ‘sulmojë’ edhe njëherë në stilin e tij.

“Neymar është i pasjellshëm, njëjtë si Pele. Messi është lojtar i veçantë dhe i jashtëzakonshëm. Unë dyshoj se dikush do të jetë më i mirë se ai”, theksoi trajneri i AL Wasl për TVE.

Maradona, i cili e kaloi pjesën më të mirë të karrierës në Napoli, njihet për fjalosjet indirekte të tij me Pelen.

Këta të dy konsiderohen lojtarët më të mirë në histori të futbollit.