Masakër mbi policinë, shteti humbet betejën me kriminelëtNga Bledar Lumani Policia shqiptare ka shënuar dje bilancin më të rëndë në përplasje me kriminelët që nga vitit i trazuar 1997. Katër punonjës policie humbën jetën në përpjekje për a

Nëse dëshironi të lexoni edicionin online të gazetës në PDF klikoni këtu.

Policia shqiptare ka shënuar dje bilancin më të rëndë në përplasje me kriminelët që nga vitit i trazuar 1997.

Katër punonjës policie humbën jetën në përpjekje për arrestimin e një prej personave më të kërkuar në Shqipëri, gjatë një operacioni që pati pesë të vdekur dhe disa të plagosur. Viktima e pestë ishte bashkëpunëtor i Dritan Dajtit, i shumëkërkuari nga policia, të plagosurit, pushues në plazhin e Durrësit.

Dritan Dajti, 38 vjeç, i shpallur në kërkim që prej vitit 2003, kur u arratis nga salla e gjyqit, strehohej në Durrës dhe ishte lokalizuar nga policia.

Policia, pasi kishte marrë informacione se tiranasi i shumëkërkuar ndodhej në Durrës me pushime, organizuan një operacion për arrestimin e tij. Policët, sipas burimeve të policisë, kanë qenë të maskuar si pushues dhe me veshje verore..

“Pas informacioneve të marra për lëvizjet e personit shumë të kërkuar, Dritan Dajti, i cili strehohej në një banesë në afërsi të pistës “Iliria” në plazhin e Durrësit, Sektori i Operacioneve Speciale pranë Drejtorisë së Përgjithshme të Policisë së Shtetit, në moment organizoi shërbime në këtë territor për të bërë të mundur identifikimin dhe kapjen e tij”, - bëri të ditur Policia e Shtetit.

Ora ishte rreth 13:45. Dritan Dajti, i shoqëruar nga kunati i tij, Ledion Mara, i cili u vra në përpjekje, u shfaq me një makinë të tipit “Tuareg”; makina me ngjyrë të errët drejtohej nga Erges Xhaxhi.

Në momentin që makina “Tuareg” me targa të huaja, CR 535 FR, është bërë gati për të ndaluar, oficerët e policisë e kanë rrethuar atë, në pritje për të kryer arrestimin e Dritan Dajtit, kur ky të dilte nga makina.

Ata që kishin një plan dhe ishin në pritje, u zunë në befasi nga personi që në vitin 2003 u arratis nga salla e gjyqit me plan të përgatitur me kujdes.

Sipas mënyrës si është zhvilluar ngjarja në sekondat fatale, mendohet se Dritan Dajti ka qenë në dijeni të pritës. Sa hapi derën e makinës, ai qëlloi në drejtim të inspektorëve të trupave speciale, katër prej tyre u vranë.

Punonjësit e vrarë të policisë, të cilët pak orë më vonë u shpallën Dëshmorë të Atdheut nga kryeministri Berisha, ishin:

Fatos Xhani, 31 vjeç, me dy fëmijë, me detyrën Shef i Sektorit të Operacioneve Speciale, në Drejtorinë Kundër krimit të Organizuar, në Departamentin për Hetimin e Krimeve, në Drejtorinë e Përgjithshme të Policisë së Shtetit.

Kastriot Çlirim Feskaj, 42 vjeç, me një fëmijë, polic i nivelit zbatues në Drejtorinë e Përgjithshme të Policisë së Shtetit, në strukturat e hetimit të krimit.

Saimir Islam Duçkallari, 32 vjeç, me dy fëmijë, punonjës policie i nivelit zbatues në Drejtorinë e Përgjithshme të Policisë së Shtetit, në strukturat e hetimit të krimit.

Altin Idriz Dizdari, 32 vjeç, punonjës policie i nivelit zbatues në Drejtorinë e Përgjithshme të Policisë së Shtetit, në strukturat e hetimit të krimit.

Viktima e pestë ishte Ledion Mara, 33 vjeç, i lindur në Lushnjë, person me precedentë kriminalë.

Dritan Dajti u plagos rëndë dhe u arrestua. Drejtuesit i mjetit, Erges Xhaxhi, i datëlindjes 1987, banues në Tiranë, po ashtu u arrestua.

Hetimet

Sipas burimeve pranë Policisë së Shtetit, mendohet se operacioni për arrestimin e Dritan Dajtit të jetë sabotuar, pasi ky i fundit ka qenë i përgatitur në momentin që do të arrestohej. Madje, në vendin e ngjarjes, atij i janë sekuestruar edhe dy radio dore policie, me të cilat mendohet se është vënë në dijeni të operacionit për arrestimin e tij. Ndërkohë, Policia e Shtetit bëri të ditur se ka nisur hetimet mbi ngjarjen e rëndë që ndodhi në qytetin e Durrësit. Mësohet se në vendngjarje kanë shkuar tre prokurorë të Prokurorisë së Krimeve të Rënda, të cilët në bashkëpunim me prokurorët e prokurorisë së Durrësit, forcat speciale RENEA kanë rrethuar zonën, pasi dyshohet se të paktën një person tjetër i armatosur ka qenë në vendngjarje me Dajtin dhe është larguar me shpejtësi. Forcat e policisë kanë bllokuar zonën e plazhit, nga “Iliria”, deri tek hotel “Florida”, ku mendohet të fshihet bashkëpunëtori i Dritan Dajtit.

Sipas burimeve të policisë, në zonën në të cilën ndodhi ngjarja e rëndë, kishte marrë me qira një hyrje për të pushuar. Madje, këto burime thanë se Dajti çdo verë i kalonte pushimet në Durrës, qytet në të cilin mendohet se edhe fshihej.

Ndërkohë, pas mjekimeve të para në spitalin e Durrësit, Dritan Dajti është dërguar nën masa të rrepta sigurie për në Spitalin Ushtarak në kryeqytet. Një makinë policie e blinduar, brenda së cilës ndodheshin forca të repartit RENEA, ka udhëhequr eskortën e Dritan Dajtit, i cili ndodhej i shtrirë me barelë në një autoambulancë dhe pas tij shumë makina të tjera policie. Ndërkohë, në spitalin e Durrësit është parë edhe bashkëshortja e Dajtit, e cila është shtatzënë. Në Drejtorinë e Policisë së Durrësit ka qenë i pranishëm edhe vetë ministri i Brendshëm, Bujar Nishani, si dhe Drejtori i Përgjithshëm i Policisë së Shtetit, Ahmet Prençi.