Mbeten në burg të akuzuarit për trafik

Dy persona të arrestuar në kohë dhe vende të ndryshme, por të akuzuar për të njëjtën vepër penale, janë paraqitur dje në Gjykatën e Krimeve të Rënda për shqyrtimin e masës së sigurisë. Që të dy kanë pasur të njëjtin fat, pasi gjykata i ka lënë në burg pa afat. Shtetasi grek, por me kombësi kazake, Aleksandro Zeitinidis, ishte i pari që ka dalë përpara togave të zeza. Ai është arrestuar në flagrancë, në pikën e kalimit kufitar të Kakavijës, teksa po përpiqej të trafikonte drejt Greqisë një sasi prej 6.4 kg heroine dhe 6.3 kg marijuanë. 47-vjeçari e kishte fshehur drogën në automjetin e tij tip "Toyota", me të cilin kishte udhëtuar nga Tirana në drejtim të Greqisë. Më pas radha i ka ardhur 26-vjeçarit Nandi Kacaj, lindur dhe banues në Sarandë. Ai është arrestuar, pasi akuzohet se është pronari i 2.2 kg marijuane e presuar që u gjet gjatë një kontrolli në autobusin tip "Volvo", me targa greke IBI 3366, të linjës Sarandë-Athinë. Për këta persona që akuzohen për veprën penale të "trafikut ndërkombëtar të lëndëve narkotike", gjykata vendosi masën "burg pa afat".