Me bllokimin e ligjit për Gjykatën e Lartë, opozita kërkon të ruajë staturën e emërimeve klienteliste

Deputeti i PD-së Dash Sula, thotë për mediat se miratimi i projektligjit do vendosë një standard të ri në sistemin gjyqësor, duke ndaluar përfundimisht emërimet jocilësore

Anëtari i komisionit parlamentar të ligjeve, deputeti i Partisë Demokratike Dash Sula akuzon opozitën se po e zvarrit qëllimisht ligjin për Gjykatën e Lartë si përpjekje për të ruajtur modelin klientelist të emërimeve joprofesionale në gjyqësor.
Deputeti Sula thotë se ligji për Gjykatën e Lartë u japë fund emërimeve jocilësore në gjykata si dhe vendos një standard të ri në sistem. Sipas tij, ky ligj synon përzgjedhjen në bazë të sistemit të karrierës dhe u jep fund emërimeve me performancë të dobët profesionale e morale, që kanë qenë ekskluzivitet i Presidentit të Republikës.
“Rekrutimi nuk është se është në standardet maksimale që bëjnë të mundur që kandidatët, anëtarët e Gjykatës së Lartë të jenë personat të cilët janë më të mirët. Prandaj në ligjin për Gjykatën e Lartë kuptohet që janë të përcaktuara shumë qartë kriteret se si do të ndiqet mënyra e emërimit të anëtarëve të Gjykatës së Lartë. Ne po synojmë si mazhorancë, që në Gjykatën e Lartë, në sistemin e drejtësisë të vazhdohet sistemi i karrierës. Kemi parasysh pastaj që edhe Presidenti i Republikës sot ka një dorë do të thoja totalisht të lirë dhe do të thoja pa kufi sa i përket mënyrës se si nxjerr dekretin për një anëtar të Gjykatës së Lartë apo një anëtar të Gjykatës Kushtetuese”, u shpreh deputeti demokrat, Dash Sula.
Ai deklaroi se, gjithashtu ligji për Gjykatën e Lartë po mban të bllokuar edhe funksionimin e Gjykatës Administrative.
“Ligji për Gjykatën e Lartë është akoma shumë herë më i rëndësishëm duke patur parasysh që Parlamenti i Shqipërisë ka miratuar edhe projektligjin për funksionimin e Gjykatës Administrative që hyn në fuqi në datën 1 janar të vitit 2013, që do të thotë se është i lidhur ngushtësisht me miratimin e ligjit për Gjykatën e Lartë”, theksoi ai.
Për zgjedhjen e Prokurorit të Përgjithshëm, deputeti i Partisë Demokratike, ka pohuar se ai duhet të vijë pas një procesi të gjatë konsultimesh dhe mbi të gjitha duhet të ketë integritet të lartë moral dhe profesional.