Minatorët në ditën e 8 të grevës. ACR: Gati të plotësojmë disa kushte

Minatorët kanë hyrë në ditën e tetë të grevës së tyre të urisë. Gjëndja e tyre shëndetësore është rënduar ndjeshëm, por ata janë shprehur se nuk tërhiqen.

Kreu i Konfederatës së minatorëve, Kolë Nikolla, tha se minatorët nuk tërhiqen, edhe nëse do të sakrifikojnë jetën e tyre.

Ai tha se greva do të përshkallëzohet dhe mund të arrihet deri në mosbindje civile.

Kompania koncensionare e minierës në Bulqëizë, ACR, ka reaguar ndërkohë në lidhje me grevën, duke deklaruar se është gati të plotësojë disa kërkesa.

Kompania shprehet se pavarësisht se minatorët e Bulqizës kanë pagat më të larta krahasuar me minatorët në vend, kompania është e gatshme të rrisë me 20% pagat e minatorëve, të përmirësojë kushtet e punës si dhe të rritë investimet në minierë.

ACR ka thënë se greva duhet të përfundojë sa më parë, pasi minatorët kanë shkelur kontratën kolektive.