Ministri i Jashtem shqiptar takon Avramopulos dhe Papulias

Bashkëpunimi energjetik që rrjedh nga projekti i përbashkët i gazjellësit TAP, çështja e paktit detar por dhe komuniteti shqiptar në Greqi, kanë qenë në fokus të deklaratave të ministrave të Jashtëm të Greqisë e Shqipërisë, Dhimitris Avramopulos e Edmond Panariti në Athinë. Gjatë takimit mes dy ministrave u bisedua mbi ecurinë e deritanishme të marrëdhënieve dypalëshe; nevojën e dinamizmit të bashkëpunimit mes dy vendeve në fusha me interes reciprok; rëndësinë e kontakteve më të shpeshta në nivele të larta; nxitjen në vazhdimësi të pranisë së biznesit dhe investimeve greke në Shqipëri; riaktivizimin apo ngritjen e komisioneve të përbashkëta me qëllim që të adresohen drejt një zgjidhjeje të gjitha çështjet që ekzistojnë në marrëdhëniet dypalëshe, si dhe avancimin e procedurave për plotësimin e mëtejshëm të kuadrit ligjor nëpërmjet nënshkrimit të marrëveshjeve në proces.
Ministri Avramopulos propozoi institucionalizimin e bashkëpunimit ndërministror përmes takimeve periodike të një grupi ministrash të të dy vendeve për të trajtuar çështje me interes  reciprok. Gjithashtu, ai kërkoi realizimin e takimeve më të shpeshta me homologun shqiptar dhe zhvillimin e konsultimeve periodike mes të dy MPJ-ve. Ministri Avramopoulos siguroi për mbështetjen e plotë të Greqisë në procesin e integrimit evropian të Shqipërisë.
Ministri Panariti e informoi z. Avramopoulos mbi arritjet e Shqipërisë në kuadër të plotësimit të 12 prioriteteve në zbatim të reformave sipas planit të veprimit për përmbushjen e kritereve për marrjen e statusit të vendit kandidat.
Ministrat përshëndetën nënshkrimin në Nju Jork të "Memorandumit të Mirëkuptimit" mes Shqipërisë, Greqisë dhe Italisë, si një arritje e madhe strategjike për ekonominë e vendeve dhe rajonin, si dhe shprehën vullnetin e përbashkët për të vijuar një bashkëpunim të ngushtë për finalizimin e projektit TAP.
Ata vlerësuan rolin e minoritetit grek në Shqipëri dhe të komunitetit shqiptar në Greqi për forcimin e lidhjeve dhe të bashkëpunimit mes dy vendeve. Ministri Panariti, duke vlerësuar politikën e deritanishme të qeverisjes qendrore dhe lokale greke, në favor të komunitetit të madh shqiptar në Greqi, kërkoi nga pala greke lehtësimin e procedurave burokratike që kanë të bëjnë me qëndrimin dhe integrimin e tyre në shoqërinë greke, por edhe me ruajtjen e gjuhës dhe kulturës së tyre.
Duke iu referuar çështjes së kufirit detar mes dy vendeve, Ministri Panariti theksoi se ajo do të trajtohet nga pala shqiptare në përputhje me interesat e vendit, kushtetutën dhe legjislacionin ndërkombëtar. Njëkohësisht, ai tha gjate takimit se çështja çame dhe e pronave të shqiptarëve në Greqi kërkon zgjidhje. Ministri Panariti kërkoi, gjithashtu, zgjidhjen e shpejtë të problemeve të vërejtura në lidhje me lëvizjen e lirë të shqiptarëve që udhëtojnë drejt Greqisë dhe dokumentet e tyre. Ai kërkoi, gjithashtu, shmangien e legalizimit te dokumenteve të të dy vendeve përmes hyrjes në fuqi në marrëdhëniet reciproke të Konventës për Vulat Apostille, kërkesë e cila gjeti mirëkuptimin e Ministrit Avramopulos.
Gjatë bisedimeve të dy Ministrat shprehën shqetësimin për rritjen e frymës nacionaliste dhe siguruan për vullnetin dhe angazhimin e tyre për një politikë që dekurajon çdo retorikë manipuluese e me ngarkesë nacionaliste që dëmton marrëdhëniet mes dy vendeve tona.
Gjithashtu, Ministrat ndanë mendime lidhur me zhvillimet e fundit në rajon, promovimin e marrëdhënieve të fqinjësisë së mirë e perspektivës euro-atlantike të të gjitha vendeve të rajonit. Ministri Panariti vlerësoi raportet e vendosura mes Qeverisë greke dhe asaj të Kosovës dhe shprehu, me këtë rast kërkesën e njohjes formale të pavarësisë së Kosovës nga shteti.
Në përfundim Ministri Panariti e ftoi homologun grek për të zhvilluar një vizitë në Shqipëri.
Këtë ftesë, Panariti ia drejtoi edhe presidentit grek, Karolos Papulias, i cili e priti në një takim të veçantë. Duke e vlerësuar zotin Papulias një mik të mirë të shqiptarëve, Panariti ka kërkuar të heqin paragjykimin përmes dialogut dhe bashkëpunimit të ngushtë. Presidenti Papulias nga ana e tij ka kërkuar vullnet për të kapërcyer problemet që ekzistojnë në mes të dy vendeve.