Ministri slloven, përfaqësuesi i BE-së në Prishtinë

Ashton emëroi dje Samuel Zhbogarin si përfaqësues në Kosovë. Do të zëvendësojë Xhentilinin në detyrë

Përfaqësuesja e lartë për Politikën e Jashtme dhe Sigurinë e Bashkimit Europian, Catherine Ashton, emëroi dje ministrin e Jashtëm në largim të Sllovenisë, Samuel Zhbogar, në postin e përfaqësuesit të posaçëm të Bashkimit Europian në Kosovë. Zoti Zhbogar ka shërbyer për një kohë të gjatë në Ministrinë e Jashtme të Sllovenisë, përfshirë edhe shërbimin e tij në postin e ambasadorit të këtij vendi në Shtetet e Bashkuara të Amerikës. Ai kishte konkurruar për postin e ri duke theksuar se përvoja diplomatike dhe politike e tij në rajon do të ndihmojë veprimtaritë e Bashkimit Europian në Kosovë. Ai do të zëvendësojë në këtë post përfaqësuesin aktual të Bashkimit Europian, Fernando Gentilini, mandati i të cilit skadon në janar të vitit që po vjen. Zoti Gentilini këtë post e trashëgoi nga diplomati holandez Pieter Faith, që është përfaqësues civil ndërkombëtar në Kosovë. Të dyja këto poste ishin paraparë me propozimin e kryenegociatorit ndërkombëtar Marti Ahtisaari, në bazë të të cilit është shpallur pavarësia e Kosovës, e cila vazhdon të kundërshtohet nga Serbia. Plani i zotit Ahtisaari kishte paraparë që pushteti dhe përgjegjësitë e përfaqësuesit civil ndërkombëtar dhe ato të përfaqësuesit të posaçëm të Bashkimit Europian, t’i takojnë të njëjtit person. Por, nga muaji maj, ishte vendosur ndarja e këtyre dy posteve që shpesh binin ndesh për shkak të mosnjohjes së pavarësisë së Kosovës nga pesë vende të Bashkimit Europian, ndërsa përfaqësuesi civil ka në mandatin e tij mbikëqyrjen e pavarësisë së Kosovës.