Mirë në Novara, mendjen te Palermo
Samir Ujkani ndihet i lumtur në Novara. Portieri kosovar arriti sukses sensacional me ekipin italian, me të cilin depërtoi dy kategori më lart, për vetëm dy sezone, duke e prekur elitën e futbollit italian.
Përfaqësuesi shqiptar planifikon të mbetet te Novara, por ai nuk ia mbyll dyert Palermos, e cila e solli në Itali, dhe Sampdorias, që ka shfaqur interesim së fundmi për shërbimet e tij. “Në Novara jam mjaft mirë, jam i lumtur këtu. Po ushtroj mirë, të shohim në vazhdim. Ia kaloj mirë me trajnerin Tesser”, theksoi Ujkani për reterete24.it.
Kartonin e portierit vushtrrias e mbajnë përgjysmë Palermo dhe Novara. Ujkani ishte transferuar tek klubi sicilian tre sezone më parë, nga Anderlechti. Ai e pranon se në të ardhmen synon të rikthehet tek ekipi Rosanero.
“Unë jam në bashkëpronësi të Palermos e Novarës. Për momentin jam lojtar i Novarës, duhet të flas me të dyja klubet për të ardhmen time. Për mua është e rëndësishme të luaj. Është e qartë se dëshiroj të rikthehem në Palermo, sepse është klub i madh, i cili më ka sjell në Itali. Atje dua të kthehem si numër 1”, vazhdoi Ujkani.
Ditëve të fundit, mediat italiane shkruajnë vazhdimisht për interesimin e Sampdorias për shërbimet e reprezentuesit të Shqipërisë. Ujkani nuk e di ende saktësisht se cila do të jetë e ardhmja e tij.
“Nuk ka asgjë zyrtare. E di se Sensibile më dëshiron atje, por... është e mundshme. Të shohim. Nuk vendos unë, vendosin klubet. Kam mjaft simpati për Pasqualen, falë tij jam në Itali dhe e jetoj një ëndërr në Novara”, tha në fund Ujkani.