Mungesa e yjeve në Euro 2012
Një ekip i përbërë nga emra yjesh të futbollit rrezikon të mos kualifikohet për në Euro 2012. Në fakt disa prej tyre si Gareth Bale, Nemanja Vidiç, Vincent Kompany e Darren Fletcher tashmë i kanë humbur gjasat që me Kombëtaret e tyre të marrin pjesë në garën e vitit të ardhshëm që zhvillohet në Ukrainë dhe Poloni.
Por, tifozët e futbollit më së tepërmi frikësohen se pas ndeshjeve të barazhit në Euro 2012 mund të mungoj futbollisti më i shtrenjtë në botë, Cristiano Ronaldo, e shumë emra të tjerë të mirënjohur si Edin Dzeko, Petr Cech, Luka Modriç, Nani e të tjerë. Vlera e përgjithshme e atyre që tashmë janë eliminuar dhe të tjerëve që rrezikojnë një gjë të tillë është plot 355 milionë euro.
Cristiano Ronaldo – 90 milionë euro (Portugali)
Para dy vitesh për shkak të lëndimit nuk u paraqit për Portugalinë në barazh kundër Bosnjës e Hercegovinës për kualifikim në Kampionatin botëror 2010. Kësaj radhe, kundër të njëjtit kundërshtar duhet të sigurojnë pjesëmarrjen për në Euro 2012.
Nemanja Vidiç - 37 milionë euro (Serbi)
Qendërmbrojtësi i Manchester Unitedit do të mungojë në Ukrainë dhe Poloni. Serbia nuk siguroi barazhin. U mposht në ndeshjen vendimtare nga Sllovenia 1-0 ndërsa Vidiç humbi një penallti.
Luka Modriç – 33 milionë euro (Kroaci)
Modriç ka zhvilluar 50 ndeshje për Kroacinë por është paraqitur vetëm në Kampionatin botëror 2006 dhe Evropianin 2008 në Austri dhe Zvicër.
Nani – 29 milionë euro (Portugali)
Në kohën e fundit po luan më pak në Manchester United por është i pazëvendësueshëm në reprezentacionin e Portugalisë. Në tetë paraqitje gjatë fushatës kualifikuese për Euro 2012 shënoi katër gola.
Petr Cech 28 milionë euro (Çekia)
Portieri i Çekisë, sipas institutit për statistika dhe histori në futboll, është në mesin e pesë portierëve më të mirë në botë më 2010. Por, ai nuk ishte prezent as në Botërorin 2010.
Edin Dzeko – 28 milionë euro (Bosnja e Hercegovina)
Sulmuesi boshnjak është njëri prej golashënuesve më të mirë të Premierligës këtë sezon. Ende nuk ka luajtur në ndonjë garë të rëndësishme evropiane. Para di viteve Bosnja u mposht në barazh për Botërorin 2010 nga Portugalia.
Gareth Bale – 25 milionë euro (Uells)
Njëri prej futbollistëve më të mirë të Tottenhamit vështirë se do të luan ndonjëherë në ndonjë garë ndërkombëtare. Por, i buzëqesh karriera në klub, edhe pse në ngjarje të rëndësishme ndërkombëtare mund të shkon vetëm si turist.
Vincent Kompany – 25 milionë euro (Belgjikë)
Njëri prej mbrojtësve më të mirë në Premierligë. Menaxheri i Cityt, Roberto Mancini nuk mund të paramendojë formacionin bazë pa të, por ai do të mungojë në Euro. Belgjika nuk është as në barazh.
Fabio Coentrao – 24 milionë euro (Portugali)
Real Madridi pagoi 35 milionë euro për transferimin e tij nga Benfica gjatë verës. Në Botërorin e vitit të kaluar iu prezantua publikut ndërkombëtar. Coentrao debutoi pikërisht kundër Bosnjës e Hercegovinës.
Darren Fletcher – 20 milionë euro (Skoci)
Kapiteni i Kombëtares skoceze ende nuk ka luajtur në një Kampionat evropian. Skocia deri në xhiron e fundit të takimeve kishte shpresuar në kualifikim por në fund u mposhtën nga Spanja.
Darijo Srna – 16 milionë euro (Kroaci)
Nëse Kroacia mposhtet në barazh për Euro 2012, Srna do të bëhet kapiteni i parë i Kroacisë që mungon rresht në dy ngjarje të rëndësishme ndërkombëtare .