Murinjo: Largimi im? Në Itali s’më respektojnë

MILANO- Pas fitimit të titullit kampion, vëmendja e Interit tashmë është e përqendruar te finalja e Ligës së Kampioneve ditën e shtunë në Madrid. Tekniku Zhoze Murinjo ka vendosur që skuadra të udhëtojë që të mërkurën për në kryeqytetin spanjoll, për shkak të frikës së mbylljes së fluturimeve si rrjedhojë e riaktivizimit të vullkanit në Islandë. Por, në një konferencë për shtyp dhënë ditën e martë, portugezi ka folur edhe për të ardhmen e tij, duke sqaruar arsyet se përse kërkon të largohet nga Italia. “Nuk ka të bëjë as me kontratën time dhe as me paratë, madje më vjen pak turp që fitoj kaq shumë në këtë kohë krize, - ka thënë ai. – Problemi është personal, pasi në Itali nuk ndjehem i respektuar dhe gjatë këtyre dy viteve kam patur probleme të shumta”. Ai tha gjithashtu se pas finales së Madridit do të marrë 3 ditë kohë për t’u menduar dhe pastaj do të bëjë të ditur vendimin e tij. “Rezultati i finales nuk do të ndikojë aspak në të ardhmen time”, tha Murinjo. Ai foli edhe për ish-mësuesin e tij Luis Van Gal, që e ka kritikuar për sjelljen dhe për faktin se mendon vetëm të fitojë dhe aspak për lojën e bukur. “Van Gal ka thënë se e shqetëson arbitri, por mua më shqetëson vetëm vullkani, - tha Murinjo. – Pastaj, italianët e mbajnë mend si fitoi Bajerni me Fiorentinën, ndërsa anglezët nuk e kanë harruar të kuqen e marrë nga Rafael i Mançesterit. Van Gal thotë se jam trajner mbrojtës, por në Londër ndaj çelsit dhe në shtëpi me Barcelonën luajtëm vetëm në sulm. Në ndeshjen e kthimit në Kamp Nou parkuam avionin para portës, por e bëmë këtë sepse i kishim shkatërruar në shtëpi”, shtoi tekniku i Interit.
(e.n/A.Latifi/BalkanWeb)