Murinjo thur planin për të ndaluar Mesin

Si mund të ndalohet Lionel Mesi? Rreth pyetjes që duket se nuk ka përgjigje, Zhoze Murinjo po mendon prej së martës, pak çaste pasi autobusi i Interit po largohej nga “Luzhniki”. Gjatë ditës së djeshme, portugezi zhvilloi një takim me stafin, ku u përcaktuan detyrat dyjavore që secili do të ketë përpara takimit me Barçën. Katër vëzhgues zikaltër do të ndjekin me kujdes ndeshjet e katalanëve: përpara gjysmëfinales së parë, “blaugranat” do të luajnë tri sfida në La Liga. Për të ndaluar Mesin, Murinjo mund të përdorë argjentinasit Kambiaso, Zaneti e Samuel, që do të krijojnë “kafazin” për lojtarin më të mirë në botë.