Nafta zbret në 49. 6 dollarë për fuçi

Çmimi i naftës në bursa po pëson çdo ditë rënie drastike. Në tregjet financiare ndërkombëtare, ari i zi është kuotuar dje me 49.6 dollarë për fuçi. Ky është edhe niveli më i ulët i shënuar në dy vitet e fundit. Që prej fundit të muajit korrik, kur ari i zi shënoi në bursa rekordin historik të 145 dollarëve për fuçi, çmimi ka rënë me më shumë se 95 dollarë. Ekspertët shpjegojnë se pikiata e naftës, vërejtur veçanërisht ditët e fundit, është shkaktuar nga frika e ngadalësimit të ekonomisë botërore, e cila do të shoqërohej me një pakësim të kërkesës globale për arin e zi. Rënia drastike e kuotave të naftës në tregjet financiare ndërkombëtare do të jetë në qendër të diskutimeve në mbledhjen e ardhshme të OPEC-ut që pritet të zhvillohet në fund të këtij muajit. Vendet prodhuese pritet të reduktojnë më tej prodhimin ditor, në përpjekje për të frenuar rënien e mëtejshme të çmimit. Sipas tyre, nafta duhet të luhatet në bursa në kufijtë 80-90 dollarë për fuçi.

Por rënia e çmimit të naftës në tregjet ndërkombëtare nuk është reflektuar në vendin tonë. Në distributorët e shitjes me pakicë, nafta e cilësisë së dobët ose ndryshe d2, shitet me 128 lekë për litër, eurodizeli me 137 lekë për litër, ndërsa benzina ka arritur në 133 lekë për litër.