Ndotja e ambientit, dy herë mbi normë

Mungesa e rrjeteve të kanalizimeve
nëntokësore në qytetin
e Gjirokastrës dhe punimet
në infrastrukturë kanë ndikuar në
rritjen e nivelit të ndotjes së mjedisit.
Sipas ekspertëve të Drejtorisë së Shëndetit
Publik, shifrat tregojnë për një
koeficient ndotjeje, dy herë më të lartë
se norma. "Shkak i ndotjes së mjedisit
në qytet, në përgjithësi ka qenë mungesa
e theksuar e rrjetit të kanalizime.
Mungesa e kolektorëve për largimin e
mbetjeve të lëngëta urbane, gjë që
ndikon herë pas here në shpërthimin
e ujërave të zeza, të cilat janë shndërruar
në problem serioz për disa lagje të
qytetit", thotë kryeinspektori i Drejtorisë
së Shëndetit Publik, Spiro
Naka. Zonat më problematike janë
lagjet tradicionale në pjesës muzeore
"Palorto", "Pazar i Vjetër", "Granicë",
"Varosh", "Zinxhira", por edhe lagjja
më e madhe në pjesën e poshtme të
qytetit, lagjja "18 Shtatori". Ndërkohë
kalimi në sipërfaqe i ujërave të zeza
dhe rritja e temperaturave, rrezikon
shpërthimin e epidemive virale. Për
këtë arsye, specialistët e Drejtorisë së
Shëndetit Publik në Gjirokastër kanë
kërkuar marrjen e masave emergjente
shtrënguese nga strukturat e policisë
ndërtimore pranë organeve të pushtetit
vendor dhe sidomos bashkisë së
qytetit, për marrjen e masave dhe normalizimin
e situatës. Masat e deritanishme
të bashkisë dhe strukturave të
tjera të pushtetit vendor, sipas ekspertëve,
janë ende të pamjaftueshme,
pasi ajri në rrugët dhe rrugicat
e pjesës më të madhe të lagjeve,
janë të mbuluara nga pluhuri. Ekspertët
theksojnë se sipas ligjit, mjediset
ku do të ndërtohen pallate të
reja, në zonat e banuara dhe sidomos
shëtitoret e mëdha ku qarkullojnë
mjete dhe qytetarët, duhet të lahen
me ujë 3 deri në 4 herë në ditë, gjë që
nuk është realizuar në Gjirokastër.
Për ekspertët, situata pritet të
bëhet edhe më problematike, gjatë
muajve të nxehtë të verës.