Ndryshimet në projektligjin për “Kodin Rrugor”, miratohen me konsensus në komisionin parlamentar të Ligjeve

Opozita voton pas dy vitesh ligjet me 84 vota

Opozita voton për herë të parë pas bojkotit 2 vjeçar të Kuvendit, një projektligj me 3/5 e votave të parlamentit. Mazhoranca dhe opozita unifikuan votat dje në komisionin parlamentar të ligjeve, për miratimin e projektligjit për ndryshimet në “Kodin Rrugor”, i cili ishte bllokuar në parlament që prej 15 marsit të vitit 2009. Ligjet me shumicë të cilësuar qëndrojnë prej dy vitesh në sirtarët e Kuvendit, në pritje të konsensusit të Partisë Socialiste. Dy nenet e Kodit Rrugor parashikonin licencimin e autoshkollave në bazë të ligjit të ri për licencimin dhe mazhoranca pranoi edhe propozimet e socialistit Gjiknuri për të ndihmuar liberalizimin e tregut. Por gjatë mbledhjes së Komisionit, situata u tensionua disa herë lidhur me vullnetin e opozitës për të votuar ligjet me shumicë të cilësuar. Përveç kodit rrugor janë edhe 15 projektligje të tjera që kërkojnë votën e opozitës dhe që pritet të diskutohen së shpejti në parlament.