Në 13 komuna, shkollat pavarësohen financiarisht

Ministria e Arsimit, e Shkencës dhe e Teknologjisë, e kënaqur me tri shkollat e para që ishin përfshirë në projektin pilot për autonomi financiare, shpalli sot se buxhet dhe financim në nivel shkolle, nga tash e tutje do të kenë edhe shkollat e 10 komunave të tjera.

Ndërsa deri në vitin 2011, pritet që autonomi të plotë financiare të kenë të gjitha shkollat në vend, u bë e ditur gjatë një takimi që ministri i Arsimit, Enver Hoxhaj, pati sot me drejtorët e shkollave të vendit.

“Formula e re e financimit parauniversitar ka krijuar një bazë të mirëfilltë legale që të gjitha shkollat e Kosovës ta kenë autonominë e plotë financiare të tyre. Rezultati i kësaj ka qenë autonomi edhe administrative, edhe financiare, si formë e delegimit të buxhetit edhe të financave nga pushteti qendror përmes Komunës, direkt në shkollë”, ka thënë ministri Hoxhaj, transmeton KosovaPress.

Shkollat në komunën e Gjilanit, të Istogut dhe atë të Kaçanikut, më 2009, ishin të parat që u pavarësuan financiarisht. Ndërsa nga sivjet, atyre u bashkohen edhe 10 komuna të tjera: Prishtina, Prizreni, Peja, Gjakova, Suhareka, Shtimja, Podujeva, Klina, Ferizaj dhe Mitrovica.

MASHT-i thotë se përmes autonomisë financiare synohet ngritja e cilësisë së shërbimeve në shkollë, që drejtorët, zyrtarët e shkollave mos të ballafaqohen me procedura të lodhshme në komunë, por të kenë një mundësi të plotë që të reagojnë ndaj nevojave reale që ka shkolla.