Në Apoloni zbulohet një reliev me motive mitologjike

Shtohet inventari i gjetjeve të rëndësishme në qytetin antik të Apolonisë. Ekspedita e përbashkët arkeologjike Shqiptaro-Franceze ka zbuluar një reliev të punuar në ashtë (kockë), një gjetje e rrallë, ndoshta unikale, sipas specialistëve të fushës së arkeologjisë.

Ky objekt në përmasa të vogla, por i ruajtur në gjendje tepër të mirë, do t'i shtohet vitrinave të muzeut arkeologjik të Apolonisë. Kjo gjetje dëshmon shkallën e lartë të zhvillimit dhe qytetërimit ilir, si dhe misteret dhe thesaret që mbart nëntoka e Apolonisë, bën të ditur BW.

"E veçanta e zbulimit është se është një punim i kualitetit të lartë në kockë, ku është fiksuar një skenë nga mitologjia greke. Ndoshta është i vetmi reliev i gjetur në kockë", thotë përgjegjësi i ekspeditës, prof Jean-Luc Lamboleu. Sipas tij, ky zbulim dëshmon se Apolonia ishte një qytet që e njihte shumë mirë mitologjinë dhe kulturën greke, madje edhe e ka kultivuar atë në zbukurimet artistike të qeramikës dhe kockave, sic është ky rast. "Është një skemë mitologjike shumë e njohur ku paraqitet Heraklisi me topuz dhe Apolloni me hark", tregon prof. Jean-Luc Lamboleu.

Sipas tij, kjo gjetje e bukur dhe e rrallë për rajonin, si dhe një sërë gjetjesh të mëparshme, sic ishin kalorësi fitues i garave olimpike dhe busti i bukuroshes aristokrate vitin e kaluar, dëshmojnë se Apolonia ka qenë një nga qytetërimet më të zhvilluara të kohës.