Nënë Ferideja e Shkupit: Ju rrëfej tmerrin e arrestimit si terroriste

SHKUP – “Tmerri i së martës që e përjetova unë, mos i ndodhtë askujt”. Kështu nis rrëfimin për gazetën KOHA 60-vjeçarja Feride Bilali nga fshati Hotël i Komunës së Likovës, e cila bashkë me dhjetëra shqiptarë të tjerë, ishte arrestuar të martën herët në mëngjes nën akuzën për terrorizëm. E liruar pas 24 orësh keqtrajtim në stacionin e policisë në Autokomandë, Ferideja thotë se asnjëherë në jetë nuk e ka menduar se ajo do të akuzohet për vrasje ose ndihmë në ekzekutimin e një krimi të pesëfishtë. I lutem Zotit të mos i ndodhë askujt ajo që unë e përjetova. Më morën në orën 4 të mëngjesit, e trishtuan mbesën 3-vjeçe, ndërsa nusen e djalit tim, e cila është shtatzënë, nga tmerri dhe frika e policëve, e shtruam në spital. Akoma nuk e kam parë nusen, tregon Ferideja, sipas të cilës, mënyra e bastisja së shtëpisë dhe akuzat e policisë ndaj saj tregojnë se drejtësia nuk është e njëjtë për gjithësecilin. Në fillim kishin bastisur shtëpinë ku nuk banon asnjeri, sepse dy djem i kam në Zvicër dhe një në Belgjikë. E kishin thyer derën e hyrjes dhe kur kanë parë se askush nuk gjendet aty, erdhën në shtëpinë ku ishim duke fjetur unë, nusja e djalit dhe mbesa ime 3-vjeçe. Kur u futën me turr, u kërkova të bastisin ngadalë sepse ma tmerruan mbesën, e cila filloi të dridhet nga frika. Edhe nusja filloi të tmerrohet, frikohesha të mos i ndodhë asgjë, sepse edhe tre javë presim të lindë fëmijën, kujton mëngjesin e hershëm 60-vjeçarja nga fshati Hotël.