Ngërçi, Lohan: BE mbështet zgjidhje kushtetuese

Ambasadori i KE-së në Tiranë, Helmuth Lohan, shpreh qëndrimin e BE-së se mbështet çdo zgjidhje politike në Shqipëri që bazohet në Kushtetutë. Pa dashur të komentojë deklaratën e ambasadorit Bosch dy ditë më parë, i cili foli për një pakt zgjidhjeje mes palëve, Lohan u përgjigj: Kjo është një pyetje që duhet tia bëni ambasadorit Bosch. Bashkimi Evropian do të mirëpriste çfarëdo lloj marrëveshjeje që do të arrihej mes udhëheqësve politikë të Shqipërisë, e cila do të respektonte parimet bazë të demokracisë, të cilat janë Kushtetuta dhe transparenca. Ambasadori Lohan shtoi më tej: Më lejoni të shtoj dhe një fjalë tjetër: ditën e martë, Bashkimi Evropian ka theksuar rëndësinë që të gjitha palët të bashkëpunojnë në mënyrë aktive që të rivendosin funksionimin e pandërprerë të Parlamentit, duke përfshirë si mazhorancën qeverisëse, ashtu dhe opozitën. Që nga dita e martë, ne nuk kemi parë progres apo ecuri, qoftë në Parlament apo në rrugë. Ai apeloi se tani ka ardhur koha që udhëheqësit politikë shqiptarë ti japin fund ngërçit politik në Shqipëri.