Nis seanca plenare, pritet të votohet komisioni për Spahiun

Nis seanca plenare e Kuvendit të Shqipërisë ku pritet të shqyrtohet kërkesa e demokratëve për shkarkimin nga detyra të zëvendëskryetarit të Këshillit të Lartë të Drejtësisë, Kreshnik Spahiu. Në axhendën e sotme të Kuvendit është parashikuar votimi për ngritjen e një komisioni parlamentar që do të hetojë veprimtarinë e Zv.kryetarit të KLD-së Spahiu.
 

Maxhoranca në kërkesën e saj argumenton se Spahiu ka shkelur ligjet, duke cënuar dinjitetin e institucionit që ai drejton, ndaj dhe nevojitet një komision hetimor. Nisma e maxhorancës, një javë më parë është kundërshtuar nga nënkryetari i KLD-së, e cila sipas tij nuk ka asnjë mbështetje kushtetuese.
 

Opozita ka deklaruar se nuk do të japë votën e saj në Kuvend për ngritjen e komisionit hetimor ndaj nënkryetarit të KLD-së pas akuzave se ai ka shfrytëzuar postin për të kryer veprimtari politike.
 

Gjithashtu Kuvendi do të njihet sot zyrtarisht edhe me kërkesën e Prokurorisë së Përgjithshme për heqjen e imunitetit të 3 deputetëve socialistë Tom Doshi, Besnik Bare dhe Taulant Balla si organizatorë të protestës së 21 janarit.