Nju Jork, Ashton çmon Thaçin si lidership

Nju Jork, 24 shtator 2011, NOA Kryediplomatja evropiane Catherine Ashton rikonfirmoi se Kosova ka perspektivë të sigurt për integrimin në Europë.
Gjatë takimit në Nju Jork me kryeministrin e Kosovës, Hashim Thaçi, baronesha Ashton e çmoi kryeministrin për lidershipin e tij në krye të Qeverisë së Kosovës, si dhe për përkushtimin e punën e mirë në forcimin e sundimit të rendit dhe ligjit në tërë territorin e Kosovës.
Zyra e shtypit e kryeministrit të Kosovës bën me dije se se kryeministri Thaçi shprehu angazhimin e Ekzekutivit të Kosovës për dialogun teknik mes Kosovës dhe Serbisë, i cili po zhvillohet në Bruksel, me ndërmjetësimin e Bashkimit Evropian (BE).
Thaçi theksoi se Qeveria që ai drejton është e gatshme të vazhdojë reformat për forcimin e qeverisjes së mirë, reformat substanciale në politikë, ekonomi dhe legjislacion, fuqizimin e rendit dhe ligjit, zhvillimin e qëndrueshëm ekonomik, në funksion të përmbushjes së plotë të axhendës evropiane të Kosovës.
Gjatë ditës së premte kryeministri Thaçi mori pjesë në Samitin e Liderëve të Ballkanit në Nju Jork, ku foli për zhvillimet në Kosovë dhe arritjet e shtetit më të ri europian.
mit/NOA

Në Foto: Catherine Ashton, Hashim Thaçi