Nofka e Kosovës

Përveç Vetëvendosjes, edhe disa deputetë të LDK’së kanë dalë pro debatit parlamentar për fusnotën. Sabri Hamiti në seancën e së mërkurës ka dhënë leksione gjuhësore për fusnotën, emrin dhe nofkën. Për marrëveshjen me Serbinë, ai ka kërkuar debat në Kuvend, kur të kthehet Kryeministri në Kosovë. Akuzave të deputetëve të LDK, AAK dhe Vetëvendosjes nuk u është përgjigjur pozita.

Fusnota, Emri dhe Nofka.

Me fusnotë po kuptohet përfaqësimi i Kosovës në nisma rajonale nën Rezolutën 1244 dhe mendimin e GJND’së për Deklaratën e Pavarësisë.

Emrin dhe nofkën e ka shpjeguar Nënkryetari i LDK’së dhe i Kuvendit, Sabri Hamiti, teksa ka folur të enjten në Parlament për marrëveshjen e fundit Kosovë – Serbi.

Duke i bërë analizë gjuhësore fusnotës, Hamiti ka treguar se në mungesë të emrit (Republikë), Kosova po e përdor nofkën ( fusnotën).

“Nofka (fusnota) e thotë mungesën(Republikën). Në këto raste nofka duke e thënë mungesën, pretendon të bëhet cilësi(Kosova pa Republikë). Kjo i bie pak a shumë sikur njerëzve kur u thonë me nofkë: Qorri, Shurdha, Qeli. Kjo s`do të thotë se ata janë përnime qorra e shurdhana edhe qela, por mungesa e tyre do të bëhet esencë”, ka thënë Hamiti.

Me këtë gjuhë figurative, deputeti i LDK’së, partia e të cilit nuk e ka përkrahur nismën e Vetëvendosjes për debat parlamentar, ka kërkuar që problemi i fusnotës të diskutohet në Kuvendin e Kosovës, por jo pa marrë pjesë “autori i fusnotës, Kryeministri Hashim Thaçi”.

“Pa kryeaktorin nuk duhet sepse Kryeministri ynë publikisht e ka marrë mbi vete autorësinë e kësaj”.

Sabri Hamiti ka folur edhe për gjuhën e përdorur kundër atyre që e kanë kundërshtuar fusnotën. Edhe këtu ka përdor figurën e elefantit dhe latinishten për të treguar qëndrimin e tij.

“Dhe këtë leksion duhet ta marrë gjithsecili që mendon se fle me një çadër me elefantin(SHBA dhe BE). Le t`i jep leksionin këtij që s`ka fjet. Atëherë le të bëhen konkretë dhe të flasin dhe unë dua vetëm ta përfundoj me një fjalë latine: Quod licet Iovi non licet bovi (Çka i lejohet Jupiterit, nuk i lejohet buallit). Nuk e përkthej shqip se ata që dinë, e dinë çka është kjo. Ndërsa po e them latinisht se latinët kanë qenë antikë – mjeshtra të drejtësisë. Anglisht s`kanë ditë”, ka thënë Hamiti.

Për dallim prej herëve të tjera, Hamitit nuk i është përgjigjur asnjë zyrtar qeveritar. Është vërejtur mungesa e përgjigjeve të Kryeministrit Thaçi, i cili nuk ka marrë pjesë në seancë për shkak të vizitës në Bruksel.

I vetmi që e ka mbrojtur fusnotën përballë opozitës ka qenë deputeti i PDK’së, Arsim Bajrami.

“Shqetësimi ka qenë real, sepse po ballafaqohemi me problemin se jo gjithherë politika ndërkombëtare koincidon me atë të vendit. Pavarësia e Kosovës është proces i koordinuar dhe nuk mund ta mohojë askush. Çështja e emrit të Kosovës, emri është Republika e Kosovës. Fatkeqësisht, BE-ja vazhdon të udhëheqë politika të padrejta karshi Kosovës”, ka thënë Bajrami.

Sipas tij, Kosova ka zgjedhur jo status quon, por hapat konkretë në afrimin drejt BE’së.

Për shpjegimet e pozitës ka folur edhe deputeti i AAK’së, Ardin Gjini.

Ai ka deklaruar se fusnota ka ardhur si pasojë e keqqeverisjes, derisa për mungesën e simboleve shtetërore të Kosovës në nismat rajonale ka treguar një zgjidhje. Ka thënë se duhet që në vend të flamurit zyrtarët e Kosovës të vishen me rroba që mbajnë simbole shtetërore. Për Edita Tahiri ka thënë se e ka më së lehti.

“Unë i kisha propozu Kuvendit që të nxjerrë një ligj që gjithë ata që e përfaqësojnë Kosovën diplomatikisht të vishen me simbole shtetërore. Edita shembull mundet me qit flamurin në syza, dikush në çorape”, ka thënë Gjini.

“Kjo Qeveria ja ka qitë faqen e zezë Kosovës. Kjo qeveri ka bërë që Serbia të duket më mirë se Kosova.... ”, ka akuzuar Gjini.

Edhe në seancën e së enjtes deputetët e Vetëvendosjes kanë kërkuar debat parlamentar për fusnotën e pranuar nga Qeveria e Kosovës. Alma Lama ka thënë se pranimi i fusnotës është bërë nga Thaçi për t`i ndihmuar Serbisë për t`u integruar në BE.

“Është tragjikomike pranimi i fusnotës në vend të Republikës”, ka thënë Lama.

Në mënyrë të koordinuar, katër deputetë të Lëvizjes Vetëvendosje i kanë lexuar pyetjet për Thaçin dhe kanë thënë se mungesa e përgjigjeve zyrtare për takimet e tij me presidentin serb po u ngjall dyshime.

S’votohen rekomandimet për pensionistët

Deputetët e Kuvendit të Kosovës nuk i kanë miratuar kërkesat e pensionistëve në seancën ku është diskutuar për gjendjen e pensionistëve, pas një peticioni drejtuar deputetëve.

Me 47 vota kundër dhe 43 pro, Kuvendi ka hedhur poshtë kërkesën e pensionistëve për t`i kërkuar Qeverisë procedimin e ligjeve, ku njihet statusi i pensionistit të Kosovës. Me këtë pensionet do të rriteshin në shumën prej 60 për qind e pagës mesatare.

Megjithëkëtë, deputetët kanë kritikuar qeverinë se nuk ka bërë asgjë për pensionistët, ndonëse u është premtuar vazhdimisht në kohë fushatash se do të ketë përmirësim të pozitës së tyre.