Nxënësit i ankohen Vocajt për sjelljen e policëve

 

TIRANE - Drejtori i Policisë së kryeqytetit, Tonin Vocaj, vizitoi dje shkollën “Vasil Shanto”, në kuadër të javës së vizitorëve të policisë. Gjatë takimit që kryepolici Vocaj zhvilloi me nxënësit e shkollës 9-vjeçare, nuk kanë munguar edhe vërejtjet që fëmijët kishin ndaj policëve rrugorë. Ata i janë ankuar drejtorit të Policisë së kryeqytetit, duke u shprehur se punonjësit e Policisë Rrugore duhet të jenë më të kulturuar gjatë shërbimit të tyre dhe gjithashtu kërkuan një sjellje më etike nga punonjësit e policisë në terren. Sipas nxënësve, shërbimi i kulturuar dhe etik do të ndikojë shumë që ata të kryejnë edhe një rol edukativ, sidomos ndaj fëmijëve. Pas bashkëbisedimit, përfaqësuesit e Policisë së Tiranës dhe ata të shkollës “Vasil Shanto” ranë dakord në vendosjen e një ure bashkëpunimi dhe dhënie informacioni për shkollat, me qëllim evidentimin e problematikave që i shqetësojnë nxënësit. Ndërsa kryepolici Ahmet Prençi ka hapur dyert e policisë për nxënësit e shkollës 9-vjeçare “Ali Demi” në Tiranë.  Gjatë vizitës së tyre nxënësit u pritën në një takim të posaçëm nga Prençi, i cili shprehu kënaqësinë e tij për prezencën e fëmijëve në këtë ditë të veçantë, kur policia hap dyert për publikun. Po ashtu Prençi inkurajoi nxënësit e pranishëm që për çdo shqetësim t’i drejtohen punonjësve të policisë, qoftë në rrugë, në komisariate apo dhe përmes telefonit pa pagesë 129 dhe policia menjëherë do t’u gjendet pranë.