Obama Franca aleati yne me i mire

Presidenti amerikan Barack Obama, në një deklaratë të raportuar mëngjesin e sotëm nga shtypi europian, e konsideroi Francën si aleatin më të çmuar të vendit të tij.

Sipas interpretimit të së përditshmes britanike “Daily Mail”, fjalët përbëjnë një goditje të madhe për Britaninë, që prej kohësh ka gëzuar statusin e marrëdhënieve të privilegjuara me SHBA-në.

Deklarata e dhënë gjatë një vizite të presidentit Sarkozy në Shtëpinë e Bardhë konfirmon bindjen e Londrës se Obama ka më pak interes se të gjithë liderat e mëparshëm amerikanë në raportet me Britaninë.

”Nuk kemi asnjë mik më të mirë se sa Nicolas Sarkozy dhe populli francez”, u shpreh Obama gjatë pritjes, pavarësisht se Britania ka pothuajse shtatë herë më shumë trupa se sa Franca në Afganistan.

Nile Gardiner, dikur një këshilltar i Kryeministres Margaret Thatcher deklaroi: “Një prononcim i tillë nga presidenti Obama na krijon një pikëpytje se me çfarë matësi i llogarit Shtëpia e Bardhë marrëdhëniet e jashtme. Se çfarë ka bërë Parisi për të merituar këto lëvdata mbetet e paqartë për ne”.