Organizata kriminale fitonte 12 mijë euro në ditë

Organizata kishte një fitim prej 12000 eurosh në ditë dhe fitimet e përllogaritura që janë dërguar në Shqipëri janë afërsisht 1.5 milionë euro. Veprimtaria kriminale ka filluar para tre vjetësh dhe kryesisht paratë e fituara brenda ditës u kalonin vëllezërve Shehu, dhe pastaj këto para mblidheshin nga shtetasi S. Shehu, i cili së bashku me shtetasin F. Z., që më datë 9 janar 2008 kanë çelur një llogari bankare në shumën prej 500 mijë eurosh. Sipas akuzës, vëllezërit Shehu shfrytëzonin edhe kunatin e tij. Ky i fundit, paratë e marra prej tyre, pasi i depozitonte, i niste drejt Greqisë në emra të shtetasve grekë me kombësi ruse. Rrjeti i trafikut, sipas hetimeve paraprake, ishte tepër i madh. Ky rrjet organizohej nga dy vëllezërit nga Drenovica e Beratit. Ndërkohë që është vërtetuar se vëllezërit nuk kanë pasur asnjë aktivitet të ligjshëm. Ata kanë bërë pastrim parash gjatë gjithë kohës. E gjithë veprimtaria e paligjshme kryhej në Athinë. Për tre vjet rresht, vëllezërit Shehu kanë vënë një pasuri të madhe, e cila nuk kishte si pikënisje ndonjë aktivitet të ligjshëm të tyre. Vëllezërit Shehu kanë blerë edhe një tokë në Tiranë. Tashmë ata do të hetohen nga Prokuroria e Krimeve të Rënda, pas hyrjes në fuqi të ligjit “Antimafia”.