PD ndërhyrje në Kushtetutë
Mazhoranca i propozoi dje në Komisionin parlamentar për Çështjet Ligjore amendimet e saj për ndryshimet në Kushtetutë. Partia Demokratike ka hedhur në tavolinën e debatit politik propozime në tri pika të rëndësishme: Mënyrën e zgjedhjes së Presidentit të Republikës nga Kuvendi, kërkesa për mocion besimi nga vetë kryeministri, si dhe kufizimin e mandatit të drejtuesit të Prokurorisë së Përgjithshme. Propozimet e bëra publike gjatë mbledhjes së Komisionit nuk kanë shkaktuar reagime qoftë nga komisionerët e Partisë Socialiste, qoftë edhe nga të tjerët, përfaqësues të partive të tjera parlamentare të djathta apo të majta. Sipas propozimit të PD-së, zgjedhja e kreut të shtetit kalon përmes pesë raundesh votimi, por nëse deri në raundin e katërt një ndër kandidatësh nuk arrin të sigurojë tri të pestat e votave, atëherë në raundin e fundit, President i Republikës zgjidhet ai kandidat që merr shumicën e thjeshtë të votave. Për sa u përket ndryshimeve që lidhen me kreun e institucionit të akuzës, propozimi i PD-së thekson se: “Prokurori i Përgjithshëm emërohet nga Presidenti i Republikës me pëlqimin e Kuvendit, për një mandat prej pesë vjetësh, me të drejtë riemërimi”. Ndërsa propozimi që flet për ndryshimin në funksionimin e qeverisë ka të bëjë me procedurën e kërkesës së mocionit ndaj kryeministrit. “Kryeministri ka të drejtë t’i paraqesë Kuvendit mocion besimi ndaj Këshillit të Ministrave. Në rast se mocioni i besimit votohet nga më pak se gjysma e të gjithë anëtarëve të Kuvendit, kryeministri brenda 48 orësh nga votimi i mocionit i kërkon Presidentit të Republikës shpërndarjen e Kuvendit”, thuhet në amendamentin kushtetues të propozuar nga PD-ja. Në paketën e propozimeve të demokratëve theksohet shfuqizimi i asaj pjese të Kushtetutës që lidhet me funksionimin e Komisionit Qendror të Zgjedhjeve. Për PD-në, kjo pjesë do të rishikohet gjatë punës së Komisionit të përkohshëm parlamentar të Reformës Zgjedhore, ku do të bëhen ndryshimet përkatëse. Në dukje, kjo pikë e fundit e propozimeve të PD-së duket si një gjest për të treguar gatishmërinë e qeverisë për t’u përballur me oponencën apo pakënaqësitë që mund të kenë deputetët ndaj punës së saj. Por, nga ana tjetër, një ndryshim i tillë në Kushtetutë, mund të përdoret nga kryeministri i vendit, cilido qoftë ai, për të bërë presion ndaj partive aleate në bashkëqeverisje. Kështu, mund të përkthehet: “O bëni si them unë, o ju çova në zgjedhje të parakohshme”. Dhe në pjesën dërrmuese të rasteve në moment zgjedhjesh të parakohshme, opozita është më e favorizuar.
Ndërkohë, në mbledhjen e djeshme të Komisionit parlamentar për Çështjet Ligjore, deputetët kanë diskutuar rreth amendimeve kushtetuese për ndryshimin e sistemit zgjedhor, të propozuara nga socialistët. Relatorët, Arenca Trashani e PD-së dhe Fatmir Xhafaj i PS-së, kanë deklaruar se sistemi më i mirë është ai proporcional rajonal. Por ky propozim është kundërshtuar fort nga ligjvënësit e partive të ashtuquajtura “të vogla”. Sipas tyre, një sistem i tillë do të eliminonte tërësisht këto forca politike që do të krijonin në vend një gjendje politike bipolare, PD-ja dhe PS-ja.
Propozimet e PD-së:
Presidenti i Republikës zgjidhet nga Kuvendi përmes 5 raundesh votimi. Nëse deri në raundin e katërt njëri nga kandidatët nuk siguron 3/5 e votave, në raundin e fundit fiton ai kandidat që merr 70+1 të votave.
Kryeministri ka të drejtë t’i kërkojë Kuvendit mocion besimi për qeverinë. Nëse humbet, atëherë i kërkohet Presidentit shpërndarjen e Kuvendit.
Prokurori i Përgjithshëm ka mandat pesëvjeçar, me të drejtë riemërimi.
Shfuqizohet nga Kushtetuta neni që flet për Komisionin Qendror të Zgjedhjeve dhe kalimi në Kodin Zgjedhor.