PDIU/Idrizi: Qeveria “Berisha” do vazhdojë punën, koalicionet varen nga rezoluta çame

Kryetari i PDIU-së, Shpëtim Idrizi deklaroi dje se do të mbështesin vazhdimin e qeverisjes së Berishës me votat e tyre, por ai nënvizoi se qëndrimi i tyre mbetet i pandryshueshëm dhe i njohur se nuk pranojnë të bëhen pjesë e kabinetit qeveritar, para miratimit të Rezolutës për Zgjidhjen e Çështjes Çame. “Ky është qëndrimi ynë parimor! Për sa i përket votimit të sotshëm, padyshim do mbështesim qeverinë. Ne do shohim mundësinë e koalicioneve pas miratimit të rezolutës çame”, theksoi Idrizi. Në Kuvend, Idrizi votoi “pro” të gjitha dekreteve të Presidentit, me përjashtim të dekretit të shkarkimit të Panaritit, për të cilin votoi kundër, si shenjë vlerësimi ndaj rolit të ministrit të deritanishëm Panariti në ndërkombëtarizimin dhe institucionalizimin e çështjes çame.