PE miraton marrëveshjen me SHBA-në për të dhënat e udhëtarëve

Parlamenti Europian miratoi marrëveshjen e diskutueshme me SHBA mbi transferimin e të dhënave të udhëtarëve. Kjo marrëveshje ka shkaktuar debate të shumta.

Deri në momentin e fundit, kundërshtarët e marrëveshjes kishin bërë ende përpjekje për të bindur kolegët e tyre në Parlamentin e Bashkimit Europian se kalimi i të dhënave të shumta dhe të pakontrolluara të udhëtarëve të aeroplanëve Departamentit të Sigurisë Kombëtare amerikane, përbënte për Ministritë e Brendshme një shkelje masive të mbrojtjes së të dhënave.

Por me votimin e shumicës, deputetët e PE nën trysninë e SHBA-së, premtojnë përmes të dhënave të udhëtarëve një lehtësim të luftës kundër terrorizmit.

Kritikët e marrëveshjes shprehen të zhgënjyer si deputeti i të Gjelbërve, Jan Albrecht: “Sipas mendimit tim ky është një hap prapa në aspektin e së drejtës ligjore dhe të drejtave civile“.

Nga çdo udhëtarë i BE-së që udhëton për në SHBA do të jepen një sërë të dhënash, ndër to emri, adresa, mënyra e pagesës dhe numri i çdo xhirollogarie. Edhe nëse dikush fluturon shpesh do të regjistrohen vendi i rezervuar apo sasia e bagazhit, si dhe ndonjë kërkesë e veçantë për ushqim në bord.

Të dhënat duhet të ruhen nga pala europiane pesë vjet, por do të jenë me emra anonimë pas gjashtë muajsh.