PS: Berisha mashtroi Frattinin për pasaportat
Deputeti socialist, Taulant Balla, tha dje se qeveria shqiptare i hodhi hi syve ministrit të Jashtëm italian në lidhje me çështjen e dokumenteve të identifikimit. Sipas Ballës, qeveria i paraqiti Frattinit një dokument model, por që nuk ka nisur akoma prodhimin dhe kushedi se kur do realizohet një gjë e tillë. “Sali Berisha u mundua dje të gënjente shqiptarët, por edhe ministrin e Jashtëm italian, me një model të pasaportës së re biometrike. Duke mbajtur në duar dosjen prezantuese të modelit të paraqitur nga kompania fituese e tenderit të pasaportave, Berisha gënjeu, duke thënë se pasaportat e reja dhe kartat e identitetit janë gati, dy elementë shumë të rëndësishëm qoftë për liberalizimin e vizave, qoftë për standardin e munguar të zgjedhjeve në Shqipëri. Deri sot asnjë shqiptar nuk ka marrë në dorë pasaportën e re dhe kartën e identitetit.
Ne, të gjithë shqiptarët, por edhe përfaqësuesit e Bashkimit Evropian nuk kemi nevojë të shohim projektet, është koha të shohim rezultatet”, - tha Balla. Deputeti socialist tha se shqiptarët po vuajnë ende murin e vizave dhe kjo për shkak të paaftësisë së qeverisë që përkthehet dhe në viktima si në rastin e Butrintit. “Nuk mund të gënjehen shqiptarët pas kaq vitesh zhgënjimi dhe pritjeje me deklarata boshe dhe mashtrime. Shqiptarët po vazhdojnë të vuajnë murin e vizave, sepse kjo qeveri nuk ka as vullnetin dhe as kapacitetet për të shënuar rezultate të dukshme në luftën kundër kriminalitetit, trafiqeve ilegale, emigracionit të paligjshëm. Tragjedia e dhimbshme e para pak ditëve në liqenin e Butrintit ishte shprehja më e qartë e dështimit të politikës dritëshkurtër të kësaj qeverie. Ditë më parë shqiptarët u njohën me deklaratën e zëvendëspresidentit të Komisionit Evropian, Jacques Barrot, i cili u shpreh se dita e liberalizimit të plotë të vizave me Shqipërinë është ende shumë larg dhe se vendimi për liberalizimin nuk do të merret as në vitin 2009. Nuk ishte e rastësishme ajo deklaratë, sepse për detyrat dhe elementët bazë që monitorohen nëpërmjet udhërrëfyesit për liberalizimin e regjimit të vizave me BE: siguria e dokumenteve, lufta kundër emigracionit të paligjshëm dhe kriminalitetit të organizuar, ruajtja dhe menaxhimi i kufijve, si dhe çështje që kanë të bëjnë me lëvizjen e personave”, - tha Balla.
“Nuk mund të bëhet politikë dhe as të fitohen vota duke u tallur me hallet e shqiptarëve, sikurse mundohet të bëjë Sali Berisha. Liberalizimi i plotë i vizave është një detyrim madhor që ne kemi ndaj shqiptarëve, por kjo nuk duhet të mbetet më thjesht dhe vetëm një premtim elektoral.
Shqiptarët e dinë tashmë se heqja e vizave varet plotësisht nga cilësia dhe shpejtësia e përmbushjes së kushteve që na ka vendosur Bashkimi Evropian.
Por, me këtë qeveri, kushtet që mund të plotësohen vetëm në një vit, nuk përmbushen as në katër vjet.”