PS, Bushati: Qeveria ka çoroditur sektorin e bujqësisë

Nënsekretari për programin në PS, Ervin Bushati, ka deklaruar se bujqësia në vend është çoroditur për shkak të projekteve të braktisura të qeverisë. Ai ka theksuar se qeveria është hedhur në projektin e ullirit pa dhënë llogari për dështimet e mëparshme. 

TIRANE- Buqjësia është cilësuar nga Partia Socialiste si sektori më i coroditur në ekonominë shqiptare. Sipas nënsekretarit për programin Ervin Bushati, shkak është mungesa e projekteve të qeverisë.
“Nuk dimë asgjë çfarë është bërë me pemëtarinë dhe me vreshtarinë, çfarë ndryshoi në jetën e bujqve dhe fermerëve shqiptarë pas këtyre projekteve të cilat sot mund të cilësohen thjesht dhe vetëm aventura qeverisëse”- ka thënë Bushati në një konferendë për mediat. Partia Socialiste ka deklaruar se të gjitha prioritetet e kësaj qeverie që prej vitit 2005 kanë mbetur në letër. Bushati ka theksuar se qeveria është hedhur në projektin e prioritetit të ullirit pa dhënë llogari për dështimet e vazhdueshme në projektet e tjera të bujqësisë.
“Qeveria e ka bërë zakon të hidhet nga një projekt humbës në tjetrin pa mbyllur llogaritë me taksapaguesit; të braktisë një projekt të dështuar për një tjetër gjëmë”- është shprehur nënsekretari Bushati.

(e.n/Balkanweb)