PS fiton Tiranën, PD merr fshatrat e Kavajën
ADI SHKEMBI
Zgjedhjet e 28 qershorit konfirmuan edhe njëherë atë dukuri të vërejtur për herë të parë në zgjedhjet lokale të vitit 2007, ku PD-ja humbi qytetet, por fitoi komunat. E njëjta situatë është pasqyruar edhe në zgjedhjet e së dielës së kaluar për sa i përket qarkut të Tiranës, por edhe qyteteve kryesore të vendit. Në Tiranë, zona më e madhe elektorale, e cila do të çojë në parlament 32 deputetë, Partia Demokratike ka fituar vetëm dy njësi vendore nga 11 që janë gjithsej, ndërkohë që në zgjedhjet e dy viteve më parë fitoi tri të tilla. Në të kundërt demokratët kanë diferencë të ndjeshme në të gjitha rrethinat e qytetit, duke kompensuar në këtë mënyrë disavantazhin në qytet.
Qyteti
Nga 11 njësi bashkiake në Tiranë, demokratët janë rikonfirmuar për të disatën herë në dy njësi, ajo 8 që përfshin zonën e Medresesë dhe në njësinë 11 në Laprakë. Në të gjitha zgjedhjet e fundit, PD ka qenë fituese në këto dy njësi, të cilat janë konsideruar si bastione të Partisë Demokratike. Nga ana tjetër socialistët kanë fituar në zgjedhjet e 28 qershorit në njësinë 10, ku në vitin 2007, kandidatët e dy forcave të mëdha politike dolën me numër të njëjtë votash dhe vetëm pas hedhjes së goglave, u shpall fitues kandidati i PD-së, Gerti Bogdani. Ndërkaq socialistët kanë fituar në nëntë njësitë e tjera, duke arritur të njëjtin rezultat me atë të dy viteve më parë. Fitoren më të thellë PS e ka arritur në njësinë 5, e cila përfshin zonën e Tiranës së Re dhe ish-Bllokun, ku katër vjet më parë kandidati i PS-së, Musa Ulqini, fitoi vetëm me 12 vota diferencë ndaj kandidatit të PD-së, Neritan Sejamini. Gjithashtu PS-ja ka konfirmuar fitoren edhe në njësitë 1, 2, 3 si dhe njësinë 6 në Kombinat, ku Lëvizja Socialiste për Integrim në vitin 2007 nxori fituese kandidaten e saj, ndonëse në koalicion me PS-në. Në këtë njësi LSI-ja ka marrë 2359 vota, numrin më të madh se në çdo njësi tjetër të qarkut të Tiranës.
Qarku
Por ndryshe nga situata në qytetin e Tiranës, në zonat përreth dhe në Kavajë, Partia Demokratike ka fituar me diferencë të madhe votash ndaj PS-së, duke ulur ndjeshëm diferencën mes këtyre dy forcave politike. Kështu, avantazhin më të madh demokratët e kanë arritur në KZAZ-në 56, që përfshin Bashkinë e Kamzës dhe zonat përreth saj, ku morën rreth 6100 vota më shumë se rivalët e tyre politikë. Gjithashtu një diferencë të madhe PD-ja ka krijuar edhe në Bashkinë e Kavajës, e njohur si bastion i kësaj partie, dhe në rrethinat e saj, ku pas përfundimit të votimeve ka rezultuar me 3600 vota më shumë se PS-ja. Në të njëjtën kohë forca më e madhe e koalicionit të djathtë ka arritur të fitojë edhe në Paskuqan, Kashar dhe Rrogozhinë. Në total Partia Demokratike ka fituar në 7 KZAZ të qarkut të Tiranës, ndaj 9 KZAZ-ve ku është shpallur fituese PS-ja. Për sa i përket numrit të votave, PS-ja ka marrë gjithsej 161.179 vota, ose 1676 vota më shumë se PD. Por futja në koalicion e 15 partive të tjera ka bërë që koalicioni “Aleanca e ndryshimit” në rang qarku të marrë një numër më të madh votash se “Bashkimi për ndryshim”. PD dhe aleatët kanë marrë 176.006 vota ndaj 172.246 votave të koalicionit të PS-së. Për sa i përket mandateve të deputetëve, koalicioni i djathtë ka fituar 16 mandate (15 PD dhe 1 PR), ndërsa koalicioni i PS-së 15 mandate dhe një mandat Lëvizja Socialiste për Integrim.
Institucionet
Njësia vendore PD PS LSI
Njësia 1 7.181 8.695 941
Njësia 2 12.652 14.388 1.585
Njësia 3 6.382 8.224 800
Njësia 4 9.591 10.568 922
Njësia 5 10.838 17.689 1.980
Njësia 6 8.054 10.049 2.359
Njësia 7 10.659 12.303 1.235
Njësia 8 7.611 6.483 658
Njësia 9 9.956 10.259 950
Njësia 10 4.819 4.991 513
Njësia 11 10.283 9.606 959
Kamza 14.014 7.821 620
Kashari 16.751 14.531 2.020
Paskuqani 15.721 14.437 807
Kavaja 8.123 4.484 403
Rrogozhina 6.868 6.651 671
Total 159.503 161.179 17419