PS rimerr bastionet në jug, revansh në veri
Socialistët dhe kandidatët e saj kanë shënuar avantazh në Bashkinë Kavajë, Bashkinë Laç dhe atë të Fushë Krujës
Partia Socialiste ndërmerr një revansh ndaj mazhorancës në 20 Bashki dhe dy komuna të shtrira në 12 qarqet e vendit. Këto njësi vendore kanë qenë nën drejtimin e partive, që aktualisht janë në koalicionin qeverisës dhe tanimë kanë ndërruar qëndrimin politik. Në krahun tjetër janë pesë Bashki, që ishin nën drejtimin e socialistëve dhe i janë rikthyer koalicionit të djathtë. Elementi më interesant në rezultatet e numërimit të votave ka të bëjë me shtrirjen e opozitës drejt disa njësive vendore, të njohura si bastione të demokratëve në veriun e Shqipërisë. Konkretisht, opozita ka marrë drejtimin e Bashkisë së Rrëshenit dhe asaj të Rubikut, ku ka përfunduar numërimi. Surprizë ishte avantazhi i konsiderueshëm i socialistëve në Bashkinë e Kavajës, ndërsa kandidati i Partisë për Drejtësi Integrim dhe Unitet mori Rrogozhinën. Sakaq, kandidatët e Partisë Socialiste janë në avantazh në Bashkinë e Laçit dhe në Bashkinë e Fushë Krujës. Partia kryesore e opozitës ka humbur drejtimin e Bashkisë së Pukës, të cilën e ka marrë Partia Demokratike, por ka rezultuar fituese në Bashkinë e Krumës dhe në Bashkinë e Hasit. Në Qarkun e Dibrës bie në sy fitorja e socialistëve, në Bashkinë e Burrelit, që ishte nën drejtimin e demokratëve. Socialistët kanë humbur kontrollin e Bashkisë së Lezhës, e cila i ka kaluar kandidatit të mazhorancës, që i përkiste Lëvizjes Socialiste për Integrim. Opozita rezulton se i ka marrë drejtimin demokratëve në Bashkinë e Ballshit, ashtu sikurse përfaqësuesit të Lëvizjes Socialiste për Integrim në Lushnje. Socialistët janë në avantazh edhe në Bashkinë e Divjakës, sipas rezultatit të mbrëmshëm. Kandidatët e selisë rozë kanë rimarrë kontrollin e Bashkisë së Sarandës dhe atë të Orikumit. Bie në sy fitorja e socialistëve edhe në Bashkinë e Himarës, ku ka rezultuar humbës kryetari në rikandidim Vasil Bollano. Bazuar në të dhënat zyrtare, të shpërndara nga Komisioni Qendror i Zgjedhjeve, rezulton se opozita dhe kandidatët e saj kanë rimarrë kontrollin e disa bastioneve të humbura në zgjedhjet lokale të 18 shkurtit 2007. Socialistët rifituan kështu Bashkinë e Tepelenës, Bashkinë e Memaliajt dhe atë të Përmetit. Nga analiza e të dhënave mësohet se socialistët kanë humbur kontrollin e Bashkisë së Urës Vajgurore, ndërsa kanë dalë fitues në Bashkinë e Poliçanit dhe në komunën e Otllakut. Një tjetër detaj i rëndësishëm në rezultatet e djeshme është kapërcimi i mbështetjes politike të komunës Grumierë të Shkodrës, e cila ka zgjedhur drejtues kandidatin e Partisë Socialiste. Po surprizë ka qenë edhe avantazhi i socialistëve në Bashkinë e Fushë Krujës, deri në orët e vona të mbrëmjes së djeshme. Partia Socialiste e ka mundur të rimarrë kontrollin e Bashkisë së Gramshit, por ka humbur Bashkinë e Cërrikut. Rezultati i Bashkisë së Kamzës ka mbetur gjatë ditës së djeshme në një rivalitet të ashpër, mes kryetarit aktual Xhelal Mziu që garon për koalicionin qeverisës dhe rivalit të tij, Rakip Suli, i cili kandidon për socialistët. Kryetari në rikandidim ka ruajtur avantazhin gjatë gjithë ditës, por Kamza ka qenë gjithnjë, një ndër njësitë vendore bastion për demokratët. D.Malaj
TABELA
ISHIN ME PD KALOJNË ME PS
Qarku Lezhë
Bashkia Laç (avantazh PS)
Bashkia Fushë-Krujë (avantazh PS)
Bashkia Rrëshen
Bashkia Rubik
Qarku Kukës
Bashkia Krumë
Bashkia Has
Qarku Dibër
Bashkia Burrel
Qarku Fier
Bashkia Lushnje
Bashkia Divjakë (avantazh PS)
Bashkia Ballsh (avantazh PS)
Komuna Levan
Komuna Dushk
Qarku Vlorë
Bashkia Sarandë
Bashkia Himarë
Bashkia Orikum
Komuna Ksamil
Qarku Gjirokastër
Bashkia Tepelenë
Bashkia Memaliaj
Bashkia Përmet
Qarku Berat
Komuna Otllak
Bashkia Poliçan
Qarku Shkodër
Komuna Grumierë
Qarku Durrës
Bashkia Fushë Krujë (avantazh PS)
Qarku Elbasan
Bashkia Gramsh
Qarku Tiranë
Bashkia Kavajë
ISHIN ME PS KALOJNË ME PD
Qarku Lezhë
Bashkia Lezhë
Qarku Shkodër
Bashkia Pukë
Qarku Elbasan
Bashkia Cërrik
Qarku Tiranë
Bashkia Rrogozhinë
Qarku Vlorë
Komuna Qendër-Vlorë
Qarku Fier
Komuna Terbuf
Qarku Korçë
Komuna Pojan