PSG barazon Montpeljene

Paris Seint Zhermen mposhti me shifrat 2-1 Olimpik Marsejën në takimin e javës së 31-të të Ligës së Parë franceze, duke regjistruar fitoren e parë në katër javët e fundit të kampionatit. Ky rezultat bën që skuadra e drejtuar nga Karlo Ançeloti të ngjitet në kuotën e 63 pikëve, aq sa ka edhe kryesuesit e Montpelje, por këta të fundit kanë një ndeshje për të rikuperuar të mërkurën pikërisht përballë Marsejës. 

Me yllin e Anzhi Makhaçkala, kamerunasin Samuel Eto'o që ishte ulur përkrah talentit të Ligës, Eden Hazard në tribunë, PSG-ja zhbllokoi rezultatin kur kronometri tregonte vetëm gjashtë minuta lojës.

Topi shkoi të Menez pas një goditje të devijuar dhe lojtari I përfaqësueses franceze nuk kishte asnjë vështirësi ta dërgonte sferën në rrjetë, pas shpinës së portierit dhe kapitenit të marsejezëve, Stiv Mandanda. 

Olimpik Marseja arriti të barazonte shifrat në të 59-tën, me sulmuesin ganez, Andre Aju që shfrytëzoi një assist të Remi, megjithatë vetëm pak sekonda më pas, PSG rigjeti avantazhin me golin e mbrojtësit Aleks, pas zhvillimeve të një goditje këndi. 

Skuadra e Ançelotit e ruajti avantazhin edhe pse e mbylli sfidën “klasike” në inferioritet numeric, pas kartonit të kuq të kapitenit Mohamed Sisoko, ndërsa pas shkëlqimit në Champions League, marsejezët e Deshamp vazhdojnë të vuajnë në kampionatin francez, ku ndodhen në vendin e 9-të me 40 pikë.